Bizge elektromobıl bólshekterin shyǵarý qajet - Ulttyq ekonomıka vıtse-mınıstri

NUR-SULTAN. QazAqparat – Keleshekte mashına jasaý salasynda elektromobıl bólshekterin shyǵarý trendke aınalady. Qazaqstan mashına jasaýshylarynyń VII forýmynda Ulttyq ekonomıka vıtse-mınıstri Jaslan Mádıev osyndaı boljam aıtty.

«Jyl basynan beri Qazaqstan boıynsha mashına jasaý salasynda 553 mlrd teńgeniń ónimi shyǵaryldy. Bul óńdeý sektoryndaǵy óndiris kóleminiń 10,6 paıyzyna teń. Saladaǵy eksport kólemi aqshaǵa shaqqanda 392 mln dollardy qurady. Ósim 65,4 paıyzǵa teń. Al ımport kólemi 5,7 mlrd dollarǵa jetti. Oılanatyn jaǵdaı. ıAǵnı, osynshama ımportty almastyrýǵa bolady degen sóz. Bul – úlken áleýet. 7 aıdyń ishinde salǵa 6,3 trln teńge ınvestıtsııa tartylǵan.

Mashına jasaý salasyndaǵy daıyn tehnıka men ónim usyný naryǵyn damyǵan elder baıaǵyda jaýlap alǵan. Bizdiń kásiporyndarǵa aralyq ónim usynýǵa bolady. Mysaly, elektromobıl bólshekterin shyǵarý qajet. Ol úshin ınvestorlardy elimizde Gigafactory qurýǵa tartýǵa bolady. Oǵan qajet paıdaly qazbalar bizde jetkilikti», - dedi vıtse-mınıstr.

Forým barysynda elektromobıl naryǵyna qajet bólshekter men qurylǵylar shyǵarý mashına jasaý salasyndaǵy negizgi trendke aınalatyny týraly boljamdar aıtyldy. Máselen, Tesla kompanııasy qazir atalmysh elektromobılge qajet batareıalardy Azııadan aldyrýǵa májbúr kórinedi. Jylyna 500 myń elektromobıl shyǵarýdy josparlap otyrǵan alpaýyt kompanııa 2020 jyly osynsha kólemde batareıa shyǵaratyn Gigafactory-dy iske qospaqshy.