Bizge araq-sharaptan góri qymyz ben shubat týraly zań kerek - A. Smaıyl
ASTANA. QazAqparat - Urpaq salaýattylyǵy úshin bizge araq-sharaptan góri qymyz ben shubat týraly zań kerek. Búgin Májiliste «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Aldan Smaıyl osyndaı másele kóterdi.
«Ortalyq Azııadaǵy eń kóp ishetin el Qazaqstan eken. Bul kúldiretin emes, jylatatyn másele. Bizde araqtyń kesirinen qanshama shańyraq shaıqaldy. Qanshalyqty urpaq araq kesirinen aýrýshań, qabiletsiz bolyp jatqany týraly birde-bir zertteý joq. Muny zertteıtin túrimiz de joq», - dedi depýtat. Sonymen qatar, zań jobasyna toqtala kele A. Smaıyl kásipkerlerdi araq satý arqyly paıda tabýǵa ıtermelemeı, olardy halyqqa, ekonomıkaǵa paıdaly kásipter ashýǵa jaǵdaı jasaý kerektigin sóz etti.
«Urpaǵyn oılaǵan elderde zań basqasha. Norvegııada boldyq, ol elde demalys pen meıram kúnderi meıramhana men dúkenniń eshqaısysynda araq satpaıdy. Eger satatyn bolsa, lıtsenzııadan birjolata aırylady. Sonda Norvegııa araqtan túsetin paıdany oılamaı otyr ma? Olar urpaq úshin osyndaı áreketke baryp otyr», - deıdi A. Smaıyl. Osyǵan oraı, depýtat araqtan góri ulttyq taǵamdy damytý máselesine nazar aýdardy.
«Biz talaı usynys berdik, biraq soǵan qulaq túrgen eshkim joq. Araq-sharaptyń ornyna ulttyq taǵam qymyz ben shubatty kóbeıtý týraly aıttyq, eshkimniń qaperine kelmedi. Túsiniksiz. Nege araqtyń tóńiregine úıirile beremiz, paıdaly iske nege jumylmaımyz. Men soǵan oraı, Úkimetke tilegim bar: Araq-sharap týraly zańdy qabyldadyńyzdar, endi ulttyq taǵamdar týraly zań jobasyn ázirleńizder. Biz ultqa kereksiz dúnıeni qabyldaı bermeı, ózimizge qajetti zańdardy qabyldaıyq. Úkimet istemese depýtattar ondaı zańdy ózimiz jazaıyq», - dedi depýtat.
Eske sala keteıik, zań jobasyn talqylaý barysynda Dúnıejúzilik densaýlyq saqtaý uıymynyń júrgizgen zertteýlerine sáıkes, spırt ishimdikterin tutyný deńgeıi jónindegi reıtıngte Qazaqstan 188 eldiń arasynda 34-oryndy ıelenip otyrǵany belgili bolǵan. «Elimizdiń árbir azamaty jylyna orta eseppen shamamen 5,5 lıtr taza etıl spırtin nemese 11 lıtr araq tutynady eken. Nátıjesinde Qazaqstan Ortalyq Azııa óńirindegi araqty eń kóp ishetin el retinde tanylyp otyr», - deıdi QR Premer-Mınıstriniń orynbasary - Qarjy mınıstri Baqyt Sultanov.
