Bizge álemdik ataýlar qalyptastyrý kerek - Elbasy

ASTANA. QazAqparat - Bizge álemdik ataýlar qalyptastyrý kerek, odan esh qorqýdyń qajeti joq. Búgin Astanada «Samuryq-Qazyna» Qorynyń transformatsııa baǵdarlamasynyń tanystyrylymyna arnalǵan forým barysynda QR Prezıdenti Nursultan Nazarbaev osylaı málimdedi.

«Biz tipti joq jerden memleket qurdyq emes pe? Keńes Odaǵyn kúl-parshasy shyǵyp synǵan ydys retinde atady. Al sonyń ishinde taqyr jerden Qazaqstandy turǵyzdyq. Qazaqtar týraly, Qazaqstan týraly eshkim de bilmeıtin. Qazir búkil álem Qazaqstannyń qaıda ornalasqanyn biledi. Biz memleketti ózgerttik, astanamyzdy saldyq, ekonomıkany aýystyrdyq. Endigi mindet - Transformatsııa», - dedi Nursultan Ábishuly.

Budan bólek, Elbasy álemdik eńbek bólinisinde de Qazaqstan óziniń laıyqty ári senimdi ornyn ıelenýi tıistigin atap ótti. «Eń mańyzdysy - Qordyń aldynda ulttyq aýqymdaǵy mindetter tur», - dedi N. Nazarbaev.