Bizdiń jumysta demalys, mereke degen joq: Astanalyq qar tazalaýshynyń ómirinen bir kún
NUR-SULTAN. QazAqparat – Astanalyq Asqar Tájenov kommýnaldyq qyzmet kórsetý salasynda tórtinshi jyl qatarynan eńbek etip keledi. Ol elordanyń Saryarqa aýdany aýmaǵyn qardan tazalaıdy. Qys túse bastaǵanda ákimdik pen turǵyndar úshin qalany qardan tazalaý - kún tártibindegi mańyzdy máseleniń biri. Osy oraıda QazAqparat tilshisi kommýnaldyq qyzmetkerdiń bir kúndik jumys barysymen tanysyp kórdi.
«Jańa jyl qarsańynda qysqartýǵa ushyrap, jumyssyz qaldym. Jańa jyldan soń jumys izdep, osyndaǵy jigitterden surastyra kele, bos orynǵa jumysqa kirdim. Osy jerde 4 jyl boıy eńbek etip kelemin. Jumysty aýysymmen isteımiz. Birinshi aýysymdaǵylar tańǵy saǵat 06:30-da bastap, tústen keıin saǵat 16:30-ǵa deıin jumys isteıdi. Ekinshi aýysym keshki saǵat 20:00-den tańerteńgi 06:00-ǵa deıin eńbektenedi. Jumys bastalar aldynda komandır búkil qyzmetkerlerdi jınap, kim qaı jerdi tazalaıtynyn belgilep beredi. Sodan soń árkim óz mindetine kirisedi, bireý kóshe qaryn jınasa, ekinshi adam aýlany tazalaıdy», - dedi Asqar Tájenov.
Onyń aıtýynsha, qar jaýǵanda aldymen halyq úshin mańyzdy nysandardyń aýmaǵy tazalanady. Ol degenimiz jol, balabaqsha, mektep, aýrýhana jáne taǵy sol sııaqty.
«Bizde jumys ornyna jumysshylardy jetkizý qyzmeti bar. Sebebi biz kúnine birneshe aýmaqty qardan tazalaımyz. Jáne bizdiń jumysymyz halyq pen ákimdiktiń tikeleı nazarynda. Kommýnaldyq qyzmettiń jumys sapasyn iKomek nemese áleýmettik jelide pikir qaldyrý arqyly ár turǵyn baǵalaı alady. Árıne, bizdiń jumysqa qatysty árkimniń pikiri ártúrli. Bireýler rıza bolyp, alǵysyn aıtyp jatsa, ekinshi adamnyń kóńili tolmaı, shaǵymdanyp jatady. Bir kúni Jaǵalaýda qar tazalap jatqanymda, qasymnan ótip bara jatqan áıel adam toqtap, maǵan eńbegim úshin rahmetin aıtty. Kerisinshe qar tazalanbady dep ursyp jatatyndar da bar. Biraq biz kóńilge almaımyz, sebebi bul bizdiń mindetimiz», - deıdi ol.
Asqar Tájenov óz jumysyna rıza. Onyń aı saıynǵy tabysy aıtýynsha, 130 myń teńge shamasynda. Odan bólek, bonýs qarastyrylǵan.
«Bizdiń jumysta demalys, mereke degen joq. Eger jumys kesteń merekege sáıkes kelse, jańa jyl kúni de qar tazalaısyń. Biz qardy arnaıy tehnıkaǵa tıeımiz, odan ári qala syrtyna alyp ketedi», - deıdi kommýnaldyq qyzmetker.
Qala ákimdiginiń málimetine súıensek, búginde elordada kommýnaldyq qyzmetpen aınalysatyn 70-ten astam merdiger uıym bar. Onda 3 myń qyzmetker men 2 myń arnaıy tehnıka jumys istep tur.
Aıta ketsek, bıyl 1 qarashadan bastap búginge deıin qala aýmaǵynan 150 myń tekshe metr qar shyǵarylypty.
Jáne elorda irgesinde 4 negizgi jáne 5 qosymsha qar polıgony bar.
