Bizdiń jigitter Azııadaǵy otandyq boks mektebiniń basymdyǵyn dáleldedi - Tımýr Qulybaev
ASTANA. 15 shilde. QazAqparat - Búgin Astanada Halyqaralyq boks qaýymdastyǵynyń (AIBA) vıtse-prezıdenti, Qazaqstan boks federatsııasynyń prezıdenti Tımýr Qulybaevtyń Azııa chempıonaty trıýmfatorlarymen kezdesýi ótti.
Iordanııada ótken Azııa birinshiliginde bizdiń boksshylarymyz jeti altyn jáne jáne bir kúmis medaldi enshilep, sondaı-aq, komandalyq esepte birinshi oryn alyp, tańǵalarlyq nátıjege qol jetkizdi, dep habarlaıdy Sports.kz .
Temirtas Júsipov (49 kg), Berik Ábdirahmanov (60 kg), Mereı Aqshalov (64 kg), Danııar Eleýsinov (69 kg), Jánibek Álimhanuly (75 kg), Anton Pınchýk (91 kg), Ivan Dychko (+91 kg) Azııa chempıondary atandy. Ádilbek Nııazymbetov (81 kg) kúmis júldege ıe boldy. Sonymen qatar, Danııar Eleýsinov Azııanyń úzdik boksshysy bolyp tanyldy.
T. Qulybaev quttyqtaý sózinde Qazaqstandaǵy sporttyń damýyna otandyq boksshylardyń qosqan zor úlesin atap aıtty jáne elimizdiń ulttyq quramasynyń jattyqtyrýshylar quramyn úzdik nátıjelermen quttyqtady: «Men bizdiń ulttyq quramany qazaqstandyq bokstyń shyn mánindegi úlken jeńisimen quttyqtaǵym keledi. Bizdiń jigitter Azııadaǵy otandyq boks mektebiniń basymdyǵyn dáleldedi. Ózderińiz biletindeı, jaqynda Qazaqstan óz tarıhynda alǵashqy ret boks boıynsha álem chempıonatyn qabyldamaq jáne onda da bizdiń qurama dál osyndaı úzdik nátıjege qol jetkizedi dep senemin. Sizderge ári qaraı da tabys tilegim keledi!».
Qazaqstan quramasynyń kapıtany jáne Azııa chempıony Danııar Eleýsinov: «Sizderdiń barlyqtaryńyzdy osy úlken jeńispen quttyqtaǵym keledi jáne sizderdiń bizge osy jyldarda bildirgen senimderińiz ben kórsetken kómekterińiz úshin alǵys aıtamyn. Bizdiń aldymyzda álem chempıonaty bar, jáne onda biz Qazaqstan namysyn laıyqty qorǵaý úshin bar kúshimizdi salamyz!», dedi.
Bokstan Qazaqstan quramasynyń bas bapkeri Myrzaǵalı Aıtjanov: «Biz jasaý kerektiń bárin jasadyq. Týrnırdegi maqsat 3 altyn medaldi jeńip alý bolatyn, biraq bizdiń jigitter Azııa chempıonatynda ózderiniń úzdik bokstaryn kórsetti jáne laıyqty jeńip shyqty. Bul jeńis - óte atqarylǵan úlken eńbektiń nátıjesi. Qazirgi ýaqytta Qazaqstan sportyn damytý úshin kóp kúsh salynyp jatqany belgili. Tımýr Asqaruly, Sizdiń senimińiz ben iltıpatyńyz bizge árqashan úlken bıikterdi baǵyndyrýǵa kómektesken. Almatydaǵy álem chempıonaty jaqyndap keledi, onda da óz mindetimizdi abyroımen oryndap, qazaqstandyq boks súıer qaýymdy taǵy da jańa jeńistermen qýantatynymyzǵa senemin!», dedi.
