Bizdiń jastardyń arasynda Bıll Geıts sııaqty ınnovatorlar, Abaı Qunanbaıuly sııaqty fılosoftar júr - Á. Jaqsybekov (FOTO)
ASTANA. QazAqparat - Búgin Astana ákimi Ádilbek Jaqsybekov daryndy balalarmen - elorda mektepteriniń oqýshylary, respýblıkalyq jáne halyqaralyq olımpıada, túrli konkýrstar men ǵylymı jobalardyń jeńimpazdarymen kezdesti.
Bul týraly elorda ákimdiginiń baspasóz qyzmetinen habarlady. Kezdesý beıresmı jaǵdaıda ótti. Sharanyń tizginin de oqýshylar óz qoldaryna aldy.
Jas fızıkter, matematıkter, ınformatıkter, arhıtektorlar, sýretshiler, ekolologtar men sportshylar elorda basshysyna ózderiniń tabystary men jetistikteri jaıynda áńgimelep, bolashaq josparlarymen bólisti.
Ákim qyzyqqa toly kezdesý úshin balalarǵa alǵysyn bildirip, kóptegen suraqtaryna jaýap berdi. Jáne sportpen, dene shynyqtyrýmen shuǵyldaný olardyń densaýlyǵy men qalypty damýyna áseri mol ekenin esterine saldy.
Qala ákimi jas kóshbasshylardy qol jetkizgen nátıjemen shektelmeı, odan ári alǵa basýǵa shaqyrdy.
«Bizdiń jastardyń arasynda Bıll Geıts sııaqty ınnovatorlar, Abaı Qunanbaıuly sııaqty fılosoftar, Qanysh Sátbaev sııaqty ǵalymdar, Muhtar Áýezov sııaqty jazýshylar júrýi múmkin.
Senderdiń oqyp, bilim alýlaryń úshin, jetilip, damýlaryń úshin barlyq múmkindikter jasalyp jatyr. Elbasynyń tapsyrmasyna sáıkes biregeı Oqýshylar saraıy salyndy, bilim berý granttarynyń sany artty, shákirtaqynyń kólemi ulǵaıdy, álemdik deńgeıdegi ýnıversıtet boı kóterdi, ıntellektýaldy mektepter salyndy, «Bolashaq» baǵdarlamasy qabyldandy, bul baǵytta áli de qyrýar jumystar júrgizile beretin bolady.
Sender - bizdiń Elordanyń jarqyn ókilisińder, El sendermen maqtanýy kerek. Búgingi tańda 67 myńnan astam astanalyq oqýshylar túrli deńgeıdegi ǵylymı-shyǵarmashylyq saıystar men olımpıadalarǵa qatysýda. Astana qalasynyń oqýshylarynan quralǵan top 7 jyl qatarynan birinshi oryndar men ataqtarǵa ıe bolyp keledi. Oǵan qosa, jaqynda ótken O. Jáýtikov atyndaǵy halyqaralyq olımpıadada bizdiń balalar matematıka men fızıka, ınformatıkadan júldeli oryndarǵa ıe boldy. Senderdiń bolashaqtaryńnyń jarqyn bolýy - bul qalamyzdyń, tutas elimizdiń bolashaǵynyń jarqyn bolýy degen sóz», - dedi ol.
Sóz sońynda Á. Jaqsybekov «Senderge tek sáttilik pen jeńister tileımin!» - dep jas jetkinshekterge óz tilegin bildirdi.
