Bizdiń xalqymyz ańqaý - Іshki ister mınıstri
ASTANA. QazAqparat - QR Іshki ister mınıstri Qalmuxanbet Qasymov qarjy pıramıdalaryna qatysty pikir bildirdi, dep habarlaıdy QazAqparat tilshisi.
Mınıstrdiń aıtýynsha, búginde qarjy pıramıdalaryna qatysatyn qazaqstandyqtar bıznespen aınalysyp júrmiz dep oılaıdy.
«Mysaly, men aqsha salamyn da, taǵy bes adamdy alyp kelýim kerek. Sol úshin bonýs alamyn. Bes adamdy kóndirip kirgizemin de, joǵaryda turǵandardan árbir adam úshin aqsha alamyn. Osylaısha, qarjy pıramıdasy qurylady. Shyny kerek, bizdiń xalqymyz ańqaý, bıznespen aınalysamyz dep oılaıdy. Biraq, shyn máninde, bireýge aldanyp júredi», - dedi Q.Qasymov jýrnalısterge bergen suxbatynda.
Mınıstr qarjy pıramıdalaryna qatysty qylmystyq isterdiń qalaısha tergeletinin de aıtyp berdi.
«Negizi, qarjy pıramıdalarynyń basy da, aıaǵy da bizde emes. Sondyqtan árbir eldiń quqyq qorǵaý organdary bólek-bólek jumys istese de, qarjy pıramıdalary boıynsha aqparat almasyp turady. Ol úshin arnaıy xalyqaralyq kelisimder bar. Biz olarǵa jazamyz, olar bizge jazady. Sóıtip, Reseıde de, Belarýsta da tergeý sharalary atqarylady. Quqyq qorǵaýshylar bárin tirnektep jınap, qarjy pıramıdasyn tolyǵymen jınaıdy. Sondyqtan biz árbir azamattyń aryzyn bólek qarastyra almaımyz», - dep atap kórsetti Q.Qasymov.
