Bizdiń ulttyq tarıhnamamyzdy qalyptastyrý dástúri 19 ǵasyrdyń ekinshi jartysynda úzilgen bolatyn - tarıhshy Sattar Májıtov
ALMATY. 17 qarasha. QazAqparat /Erlik Erjanuly/ - Qazaq tarıhyn jazatyn ýaqyt jetti. Bul keshe Almatyda ótken «Temirqazyq» ulttyq sarapshylar klýbynyń otyrysynda aıtyldy.
"Tarıh qoınaýyna úńilgen saıyn qashan qazaqtyń tarıhy jazylady eken degen oı týady. Biz osy kúnge deıin «Qazaqstan tarıhy» dep kele jatyrmyz.
Bizdi kóshpendiler retinde kórsetkisi keletinder bar. Men ondaı kózqaraspen tolyq kelispeımin. «Nomad» degen sózdiń ózi aǵylshyn tilinen aýdarǵan kezde turaqty mekeni ne eli joq, ulttyq qundylyqtarynan beımálim halyq degendi bildiredi. Kóshpelilik dástúrli ómir súrý ádisi. Úlken mádenıettik, rýhanı negizi bar dúnıe. Kóshpendilik pen kóshpelilikti shatastyrýǵa bolmaıdy», - deıdi tarıh ǵylymdarynyń doktory Sattar Májıtov. Shoqan Ýálıhanov atyndaǵy tarıh jáne etnologııa ınstıtýtynyń bólim meńgerýshisiniń aıtýynsha, ár tarıhshy ult tarıhyn jazýǵa óz úlesin qosýda. Bul jaqsy úrdis. Olardy keıde túsinbeı tarıhtyń keıbir betteri ańyzǵa aınalyp bara jatyr deıtinder bar. «Ulttyq tarıhnamanyń qalyptasýy úshin 20 jyl óte qysqa merzim. Bizdiń ulttyq tarıhnamamyzdy qalyptastyrý dástúri 19 ǵasyrdyń ekinshi jartysynan beri úzilgen bolatyn.. Biz tarıhı jadymyzdy endi ǵana jańǵyrtyp, qalyptastyryp ornyna qoıyp jatqan halyqpyz, - deıdi Sattar Fazyluly.
