Bizdiń sportymyzdy bireý urlaıdy dep oılaǵan joqpyz - Anatolıı Kım

«Shynymdy aıtsam, bizdiń sport túrimizdi bireý tartyp alýǵa tyrysady degendi oılaǵan da joqpyz. Makaoda ótken Álem chempıonatynda bizdiń komandamyzdy múldem basqa uıym - Qazaqstan Respýblıkasynyń grepplıng, pankratıon men aralas jekpe-jekterdiń ulttyq federatsııasynyń atynan shyǵarmaqshy boldy. Biz ony saıystyń aldynda biraq bildik. Ol ótinishti Aıdar Maxmetov berdi. Bizde sol qujattyń kóshirmesi bar. Onda bizdiń sportshylarymyzdyń aty-jóni jáne Aıdar Maxmetovtyń esimi jazylǵan. Biraq Maxmetovtyń ózi qol qoımaǵan. Negizi, biz onymen eki jyl buryn tanysqan bolatynbyz. Iá, onyń sporttyq jetistikteri bar. Sondyqtan ózara áriptestik ornatyp, oǵan bizdiń sport túrimizge jatatyn salalardy biriktirý mindeti júkteldi. Alaıda úsh jyldyń ishinde eshteńe istelgen joq. Al Makaodaǵy jaǵdaı biz úshin múldem kútpegen jańalyq boldy. Sonda bizdiń artymyzda múldem basqa jumys jasaldy ma? Ony reıderlik jaýlap alý dep aıtpasqa bolmaıdy», - deıdi A.Kım.

Aıta keteıik, buǵan deıin Qazaqstannyń MMA aralas jekpe-jek óneri federatsııasynyń prezıdenti Anatolıı Kım Baqylaý keńesiniń tóraǵasy Aıdar Mahmetovty Makaoda ótken Álem chempıonaty kezinde basqa federatsııanyń atynan ótinish bergeni úshin aıyptap, Baqylaý keńesiniń tóraǵasy mártebesinen aıyrylýyna qatysty málimdeme jasaǵan bolatyn. 

Alaıda kúni keshe Búkilálemdik MAA qaýymdastyǵy Qazaqstannyń MMA federatsııasy taratqan aqparatty joqqa shyǵardy. Al uıym  prezıdenti Vadım Fınkelshteın Makaoda bolǵan jaǵdaıǵa túsinikteme berdi.

Onyń aıtýynsha,  osy ýaqytqa deıin Qazaqstannyń MMA federatsııasy men onyń basshysy Anatolıı Kım WMMAA jarǵysyn bir ret emes, birneshe ret buzǵan. Birinshiden, uıymnyń jarnasy tólengen joq. Aǵymdaǵy jyly tamyz aıynda sońǵy eskertý jasaldy. Onda jarna tólenbegen jaǵdaıda Qazaqstannyń MMA federatsııasynyń músheligi toqtatylyp, Anatolıı Kımniń daýys berý quqyǵynan aıyrylylatyny jaıynda aıtylǵan. Sol kezde Qazaqstan Respýblıkasynyń grepplıng, pankratıon men aralas jekpe-jekterdiń ulttyq federatsııasy WMMAA músheligine ótýge ótinish bildirdi.

«Atalǵan federatsııa Qazaqstannyń Ulttyq Olımpıada komıtetiniń akkredıtatsııasynan ótken. Búkilálemdik MMA qaýymdastyǵy úshin bul - mańyzdy jáıt. Sebebi kelesi jyldan bastap biz úlken olımpıadalyq otbasynyń múshesi bolýdy kózdep otyrmyz. Sondyqtan qaýymdastyqtyń quramyna kiretin uıymdardyń óz elinde UOK tirkeýinen ótkeni durys. Biz osy ótinishti qarap, Qazaqstan Respýblıkasynyń grepplıng, pankratıon men aralas jekpe-jekterdiń ulttyq federatsııasyn qaýymdastyǵynyń músheliginen úmitker retinde tirkedik», - deıdi V.Fınkelshteın óz málimdemesinde.

Osyǵan baılanysty Makaodaǵy Álem chempıonaty kezinde ótken WMMAA Kongresinde Qazaqstannyń eki federatsııasyna qatysty másele qaraldy. Atalǵan jıynǵa WMMAA basshylyǵy, Azııa men Eýropa bólimsheleriniń jetekshileri, sondaı-aq uıymnyń qurmetti prezıdenti Fedor Emelıanenko qatysty. Sol jerde «eki federatsııa birigip jumys istesin, ıa bolmasa jańa jylǵa deıin naqty qaı uıymnyń WMMAA-nyń atynan shyǵatynyn anyqtasyn» degen eki usynys jasaldy. Al atalǵan sport túrin olımpıadalyq qozǵalys retinde damytý máselesine kelgende Anatolıı Kım jaýap berýdiń ornyna Qazaqstannyń grepplıng, pankratıon men aralas jekpe-jekterdiń ulttyq federatsııasynyń basshysy Saǵyndyq Makeevti alaıaqtyq úshin kinálap, doq kórsetti. Alaıda eshqandaı dálel keltirgen joq. Oǵan Fedor Emelıanenko da eskertý jasady. A.Kım ózine unamaıtyn sheshimniń qabyldanǵanyn jetkizip, Qazaqstan quramasynyń fınaldyq jekpe-jekterge qatyspaıtynyn málimdedi. Sosyn turyp, shyǵyp ketti. «Osylaısha, Kım myrza keńes múshelerine qurmetsizdik tanytyp, WMMAA jarlyǵynyń erejelerin buzdy», - deıdi  V.Fınkelshteın.

A.Kımniń sheshimine qaramastan, S.Makeev ol jaǵdaıdy sheshýge baryn salyp, qazaqstandyq sportshylardyń fınaldyq jekpe-jekterge qatysýyn uıymdastyrdy. Sportshylardyń ózderi de fınalǵa qatysqandy qalady. «Kım myrzanyń áreketi orynsyz ári WMMAA jarǵysy men Olımpıada xartııasyna qaıshy keledi de sanaımyz. Sondaı-aq biz qazaq sportshylarynyń fınalda óner kórsetip, ekinshi oryn alǵandaryna qýanyshtymyz. Bunyń bári Makeev myrzanyń eńbegi arqasynda júzege asty. Oǵan kez kelgen máseleni beıbit turǵyda sheshýge tyrysatyny úshin alǵys bildiremiz», - delingen V.Fınkelshteıniń málimdemesinde.