Bizdiń ortalyqtaǵy qan komponentterin daıyndaý jaǵdaıy eń joǵary talaptarǵa jaýap beredi - Jandos Búrkitbaev
ASTANA. 8 maýsym. QazAqparat /Aıdar Ospanalıev/ - «Sońǵy jyldary donatsııa daıyndaý mólsheri men onyń sany respýblıka boıynsha bir deńgeıde saqtalyp otyr. Tek Astana qalasynda ǵana olardy daıyndaý sharalary belsendi júrgizilip, birshama ósimge qol jetkizildi»,
dedi Transfýzıologııa ǵylymı-óndiris ortalyǵynyń dırektory Jandos Búrkitbaev búgin Astanada ótip jatqan «Transfýzııalyq terapııa qaýipsizdigin qamtamasyz etýdiń qazirgi zamanǵy tehnologııalary» atty taqyryptaǵy respýblıkalyq ǵylymı-tájirıbelik konferentsııa barysynda.
Ortalyq dırektorynyń sózine qaraǵanda, donatsııa daıyndaý isinde astanalyq Qan quıý ortalyǵy qol jetkizip otyrǵan jetistik negizinen elordada jańadan ashylyp jatqan densaýlyq saqtaý nysandarymen baılanysty. Sol sebepti de Astanada donatsııa kólemi 1 myń adamǵa shaqqanda 53-ten keledi. Al respýblıka boıynsha bul kórsetkish myń adamǵa 18 donatsııadan kelip otyr. «Esterińizde bolsa, 2007 jyly Ońtústik Qazaqstan oblysynda nárestelerdiń AQTQ indetine shaldyǵý jaǵdaıynan keıin Memleket basshysynyń tapsyrmasymen 2008-2010 jyldardy qamtıtyn qan quıý qyzmetin jetildirý baǵdarlamasy jasaldy. Osy baǵdarlamanyń yqpalymen elimizdiń 10 aımaǵynda zamanǵa saı jańa qan quıý ortalyqtary salyndy. Osy baǵdarlamanyń aıasynda qan quıýshy mamandardyń biliktilikterin arttyrý úshin memleket qomaqty qarjy da bóldi. Nátıjesinde respýblıkada 170-ten astam mamandar transfýzıologııanyń túrli baǵyttary boıynsha alys, jaqyn shet memleketterden bilim alyp keldi»,-dedi ortalyq dırektory.
Sondaı-aq onyń aıtýynsha, qan quıý qyzmetin jetildirýge arnalǵan baǵdarlama elordada qan quıatyn jańa ortalyq boı kóterip, qannyń jańa komponetterin shyǵarýǵa qolaıly jaǵdaı týdyryp, jumys ónimdiligin talapqa saı júzege asyrýǵa múmkindik berdi. «Bizdiń Ortalyqtaǵy qan komponentterin daıyndaý jaǵdaıy eń joǵary talaptarǵa jaýap beredi»,-dedi J.Búrkitbaev.
Sondaı-aq jıyn barysynda eldegi qan quıý ortalyqtaryna baılanysty jaǵdaı jóninde baıandaǵan Ortalyq dırektorynyń málimetterinshe, búginde respýblıkada 23 qan quıý ortalyǵy bar. Olardyń 15-i oblystarda jáne Almaty qalasynda ornalasqan. Sondaı-aq Astanada transfýzıologııalyq ǵylymı-óndiris ortalyǵy bar. «Al qan quıý máselesine arnalǵan osynshama joǵary deńgeıdegi alqaly jıyn elimizde alǵash ret uıymdastyrylyp otyr»,-dep atap kórsetti J.Búrkitbaev.
