Bizdiń ortaq maqsatymyz - saılaýdyń ashyqtyǵyn qamtamasyz etý - OSK
ASTANA. QazAqparat - Búgin Astanada semınar-trenıng barysynda Qazaqstan Respýblıkasy Ortalyq saılaý komıssııasynyń múshesi Lázzat Súleımen saılaý baqylaýshylarymen kezdesip, olardyń saýaldaryna jaýap berdi.
«Sizder prezıdenttik saılaýda baqylaý protsesine qatysasyzdar. Saılaý komıssııalarynyń qyzmetkerlerimen árdaıym baılanys jasap turatyndaryńyz anyq. Táýelsiz baqylaýshy bolsańyzdar da, bizdiń basty ortaq maqsatymyz - saılaýdyń ashyqtyǵyn qamtamasyz etý. Eger qoǵamdyq uıymdardyń atynan kelgen baqylaýshylar olqylyqtardy kórip jatsa jáne ol týraly saılaý komıssııasyn qulaqtandyryp otyrsa, komıssııa qyzmetkerlerine ǵana emes, barlyq saılaý barysyna úlken kómek beresizder», - dedi ol.
Onyń aıtýynsha, ol úshin baqylaýshylar men saılaý komıssııasynyń músheleri arasynda baılanys bolǵany abzal.
«Eń basty mınýs - saılaý komıssııasy óz jaıymen, baqylaýshylar óz isimen júredi. Sondyqtan biz sizderdiń telefon nómirlerińizdi oblystyq saılaý komıssııalaryna joldaı alamyz. Sizderge saılaý komıssııalarymen baılanys ornatýǵa jol ashylady. Memleket te, múdde de bir - sondyqtan protsestiń tazalyǵyna jumys jasaıyq», - dep túıdi oıyn L.Súleımen.
«QR Prezıdentiniń kezekten tys saılaýyn qoǵamdyq baqylaýdyń róli: demokratııalyq kontsept» atty semınar-trenıngti Saılaýdy baqylaý jónindegi respýblıkalyq qoǵamdyq komıssııa uıymdastyrǵan bolatyn. Onyń basty maqsaty - baqylaý protsesin jetildirý. Oǵan saılaýaldy baqylaýshylar men qoǵamdyq uıymdardyń músheleri qatysty.
