Bizdiń ónimderimiz basqa elderde tanymal bolýy tıis - Asqar Mamın
Atqarylyp jatqan jumystar týraly ulttyq ekonomıka mınıstri R. Dálenov, ındýstrııa jáne ınfraqurylymdyq damý mınıstri R. Sklıar, aýyl sharýashylyǵy mınıstri S. Omarov, sondaı-aq «Báıterek» UBH» AQ basqarma tóraǵasy A. Áriphanov baıandady. Óz kezeginde syrtqy ister mınıstri B. Atamqulov syrtqy naryqtarda eksporttyq ónimdi ilgerilertý týraly aqparattandyrdy.
«Elimizdiń eksporttyq áleýetin damytý - ekonomıkanyń sapaly ósimin qamtamasyz etýdiń strategııalyq mańyzdy faktory», - dedi A. Mamın.
2018 jyldyń qorytyndysy boıynsha shıkizattyq emes eksport kólemi $23 mlrd qurady, sonyń ishinde shıkizattyq emes taýarlar eksportynyń kólemi - $15,7 mlrd jáne kórsetiletin qyzmetter eksporty - $7,3 mlrd.
Eksporttyq strategııaǵa sáıkes, QR Úkimetiniń aldynda 2022 jylǵa qaraı shıkizattyq emes eksportty $32 mlrd deıin jetkizý mindeti tur.
QR Premer-Mınıstri EAEO aıasynda seriktes eldermen, Qytaımen jáne basqa da memlekettermen saýda aınalymyn ulǵaıtýdyń basty sharty otandyq taýarlar men kórsetiletin qyzmetterdiń básekege qabilettiligin arttyrý ekenin atap ótti. Bul úshin eksportty memlekettik qoldaý sharalary qarastyrylǵan, Qazaqstandyq ındýstrııa jáne eksport ortalyǵy quryldy. Bıznesti memlekettik qoldaýdyń qarjylaı quraldary óndiristen bastap eksportqa deıin bir jerde shoǵyrlanady.
«Transshekaralyq ınfraqurylymnyń sapasy men qoljetimdiligin arttyrý jumystaryn kúsheıtý qajet. Bul asa mańyzdy, sebebi bizdiń kórshiles saýda seriktesterimizdiń ekonomıkalarynyń ósý boljamdary turaqty», - dedi QR Premer-Mınıstri.
Otandyq aýyl sharýashylyǵy eksportyn ilgeriletýge jekeleı kóńil bólindi.
«Bizdiń ónimderimiz basqa elderde tanymal bolýy tıis, ári ortaq eksporttyq brendti qurý arqyly eksportty damytý qajet», - degen Úkimet basshysy olardy syrtqy naryqtarǵa qarqyndy túrde shyǵarý qajet ekenine nazar aýdardy.
Bul úshin qazaqstandyq óndirýshiler óndiretin taýarlardyń sapasyn joǵarylatyp, eksportqa shyǵarylatyn elderdiń talaptaryna jáne reglamentterine tolyq sáıkestigin qamtamasyz etýi qajet.
«Zamanaýı zerthanalyq baza qurý kerek. Bul bıznestiń óz taýarlary men kórsetiletin qyzmetterine tıisti sertıfıkattar alýyna kómektesedi», - dep QR Úkimetiniń basshysy, eksportqa baǵdarlanǵan taýarlardy halyqaralyq elektrondy saýda alańdary arqyly satý máselesin pysyqtaý qajet ekenin aıtty.
QR Premer-Mınıstri A. Mamın máseleni qaraý qorytyndysy boıynsha bir aı merzimde barlyq salalar boıynsha eksportty damytý jáne kórsetiletin qyzmetterdiń basym sektorlary boıynsha jol kartalaryn ázirleýdi, sondaı-aq, halyqaralyq deńgeıge saı keletin qazaqstandyq standarttar, tehnıkalyq reglamentter men normlardy ázirlep, engizýdi tapsyrdy.
