Bizdiń naryqta qazaqstandyq kásipkerlerdiń kóp bolǵanyn qalaımyz – Túrkııanyń Syrtqy ister mınıstri

ASTANA. QazAqparat – Byltyr Qazaqstan men Túrkııa arasyndaǵy taýar aınalymy 60%-ǵa ósti. Bul týraly QR Syrtqy ister mınıstri Murat Nurtileýmen kezdesken Túrkııanyń Syrtqy ister mınıstri Hakan Fıdan málim etti, dep habarlaıdy QazAqparat tilshisi.

«2022 jyly eki el arasyndaǵy taýar aınalymy 2021 jylmen salystyrǵanda shamamen 60%-ǵa ósti. Bıylǵy kórsetkishter de jaman emes. Aldaǵy maqsat - ekijaqty taýar aınalymyn 10 mlrd dollarǵa deıin jetkizý», - dedi Hakan Fıdan.

Ol sondaı-aq Túrkııa memeketi Qazaqstan ekonomıkasyna kóp kólemde ınvestıtsııa baǵyttap jatqan elderdiń biri ekenin atap ótti.

«Biz baǵyttaǵan jalpy ınvestıtsııa kólemi 5 mlrd dollardan asady. Túrkııa Qazaqstandaǵy iri sheteldik ınvestorlardyń biri sanalady. Biz qazaqstandyq kásipkerlerdiń Túrkııa naryǵynda kóbirek bolǵanyn qalaımyz. Sonymen birge energetıka salasyndaǵy yntymaqtastyqty tereńdete túsýge nıettimiz», - dep túıindedi Hakan Fıdan.

Aıta keteıik, jyl basynan beri Túrkııa men Qazaqstan arasyndaǵy saýda aınalymy 3,6 mlrd dollarǵa jetti.