Bizdiń mindetimiz - Qysqy Azııa oıyndarynda úshinshi márte jeńiske jetý - Hokkeıden áıelder quramasynyń jattyqtyrýshysy A. Maltsev

Biraq qalaı bolǵanda da, biz aldaǵy Azıadada úshinshi márte jeńiske jetý mindetin qoıyp otyrmyz». Hokkeıden Qazaqstannyń áıelder quramasynyń jattyqtyrýshysy, «Aısulý» hokkeı klýbynyń dırektory Aleksandr Maltsev «QazAqparat» tilshisine bergen suhbatynda osylaı dedi.

- Aleksandr Ivanovıch, Qazaqstannyń áıelder quramasy týraly aıtyp berseńiz. Oıynshylardyń arasynan kimderdi bóle-jara aıtar edińiz?

- Qurama búginde tolyq jasaqtalyp bitti - keńeıtilgen tizimge 30 adam kirip otyr. Olardyń arasynan komandada kóp jyldar boıy oınap kele jatqan Natalıa ıAkovchýk, Olga Potapova, Vıktorııa Sazonova, Olga Krıýkova, Olga Konysheva, Vıktorııa Mýsataev syndy sportshylardy erekshe atap óter edim. Taǵy bir aıta ketetin jaıt, Vıktorııa Musataeva tórt Azıada oıyndaryna qatysqan oıynshy. Al jas oıynshylardyń ishinen Ǵalııa Nurǵalıevany, Zarına Toqtıevany, qaqpashy Darıa Obydenovalardy bóle-jara atap ótkim keledi. Qazaqstanda áıelder hokkeıi dúnıege kelgen 15 jyldyń ishinde bizdiń ulttyq qurama belgili bir jetistikterge qol jetkizip otyr, sońǵy Álem chempıonatynda biz altynshy orynǵa taban tiredik. Árıne, biz áli de bolsa turaqty jetistikter kórsete almaýdamyz, biraq sońǵy úsh jylda qurama joǵary dıvızıonnan túspeı keledi. Qysqy Azıada oıyndaryna tórt ret qatystyq: 1996 jáne 1999 jyldardaǵy oıyndarda úshinshi oryn aldyq jáne olar bizdiń alǵashqy qadamdarymyz bolatyn. Al 2003 jáne 2007 jyldarda ótken besinshi jáne altynshy Qysqy Azııa oıyndarynda bizdiń komanda altyn medaldardy qanjyǵasyna baılady.

- Qyzdar komandasyn jattyqtyrý qıyn emes pe? Sebebi, ómir bir orynda turmaıdy, hokkeıshi qyzdar da turmysqa shyǵady, ómirge urpaq ákeledi degendeı...

-Árıne, bul turǵyda qıynshylyqtar bar. Qyz-kelinshekterdiń qoǵamda óz rolderi bar ekenin biz túsinemiz jáne oǵan daıynbyz. Keıbireýleri otbasy men sportty qatar alyp júre alsa, endi bireýlerine otaǵalary hokkeımen aınalysýǵa ruqsat bermeı jatady. Men ony túsinemin, áıeli únemi úıde bolmaǵan, balasy anasyn sırek kóretin otbasyna qıyndaý. Eger múmkindikteri bolyp jatsa, qyzdar jarystarǵa balalaryn ózderimen birge alyp júredi. Mysaly Azııalyq jarystardyń birine Olga Krıýkova emshekten shyqpaǵan balasymen bardy. Al qazir Vıka Musataevanyń nárestesi bar jáne Eýrolıganyń birinshi kezeńine bararymyzda Vıka da sábıin ózimen alyp júretin bolady. Hokkeı - sporttyń qıyn túrleriniń biri, biraq soǵan qaramastan, qyzdarymyz er azamattarmen teń oıyn kórsetýde, tipti keıde olardan artyq oınamasa, kem túspeıdi.

- Qazaqstanda qyzdar hokkeıin damytý isi qalaı, qandaı da bir qıynshylyqtar bar ma?

- Qazaqstandyq qyzdar hokkeıiniń sporttyq ortalyǵy da, aldyńǵy shebi de Almaty bolyp tabylady. Sondaı-aq bizge aımaqtar -Óskemen, Rýdnyı, Qaraǵandy qalalary belsendi qoldaý kórsetip otyr, sporttyń bul túri aldaǵy ýaqytta Astanada da damýy yqtımal. Qyzdar hokkeıimen aınalysqysy keletinder jetkilikti, biraq Qazaqstanda sporttyń bul túrin meılinshe keńirek damytýǵa jaǵdaı joq - mamandandyrylǵan mektepter joq. Aıtalyq erler hokkeıindegideı mektepter bizde de bolǵanyn qalaımyz. Bul máselege tereń nazar aýdaryp jatqandar azdaý, qyzdar hokkeıin kóbine esepke ala bermeıdi, negizgi nazardy ul balalarǵa aýdaryp jatady. Osy turǵydan uldar da, qyzdar da bara alatyn birlesken sporttyq toptar qurý kerek, biraq bul keleshektiń úlesindegi is. Ázirge Óskemendegi bólim men Eýropa chempıondary kýbogynyń qola júldegeri - bizdiń almatylyq «Aısulý» klýby ulttyq quramanyń negizin qurap otyr.

- «Aısulý» klýbynyń keleshek josparlary qandaı?

- Ázirge óz hokkeı mektebimizdi qurýdy maqsat etip otyrmyz, biraq bul máseleniń de túıini bazaǵa tirelip otyr. Baza bolǵan kezde, biz óz toptarymyzdy quryp, olardy basqara alatyn bolamyz, óz rezervterimizge qol jetkizemiz. Biz sondaı-aq ekinshi klýbtyq jastar komandasyn qurýdy josparlap otyrmyz.

- Sport saraıy qazir qaıta jańartylýda. Sizder qazir qaıda jattyǵyp jatyrsyzdar?

- Shyn máninde, jattyǵatyn oryn jetispeýshiligi joq emes, biraq «Aqtulaq» sporttyq-saýyqtyrý kesheninde jaqsy baza bar, biz sonda jattyǵyp jatyrmyz. Jańartý jumystarynan keıin Sport saraıy barlyq halyqaralyq talaptarǵa saı bolady dep úmittenemiz.

- Aldaǵy Azıada oıyndarynda kimder negizgi qarsylas bolady dep sanaısyz?
- Eń aldymen - Japonııa jáne Qytaı komandalary. Sondaı-aq Soltústik Koreıanyń qyzdaryn da esepten shyǵarýǵa bolmaıdy. Ońaı oıyn bolmaıtyny anyq, komandalardyń kúshteri ózara teń. Sondyqtan da kimniń jeńiske degen talpynysy kúshti bolsa, sol jeńiske jetedi.