Bizdiń maqsatymyz sport keshenderin salyp qana qoımaı, halyqaralyq standarttarǵa saı etý - M.Ospanov
ALMATY. 6 sáýir. QazAqparat /Ádilet Musahaev/ - «100 mektep, 100 emhana» baǵdarlamasy aıasynda biz 38 mekteptiń sport zalynyń edenderin jasandy tósenishtermen qamtamasyz ettik.
Bul jaıynda «Adiana Sport Story» JShS-niń dırektory Mádı Ospanov búgin Almatydaǵy «Fýtbol alańdary men jasandy shóp. Qurylys pen kútim» atty semınar barysynda málim etti.
Ol Elbasy sportty damytýǵa úlken mán berip otyrǵandyǵyn aıta kele búgingi sharany elimizdiń fýtbol federatsııasymen birigip ótkizip otyrǵandyǵyn atap ótti. "Bizdiń maqsatymyz - sport keshenderin salyp qana qoımaı, halyqaralyq standarttarǵa saı etip salý", - deıdi M.Ospanov.
«Adiana Sport Story» kompanııasy ashyq sporttyq alańdardy salýmen jáne olardyń edenderin jasandy tósenshelermen jabdyqtaýmen aınalysady. Sondaı-aq kompanııa 64 tennıs alańyn jasandy tósenáshtermen qamtamasyz etip, sport alańdaryn parkettermen de qaptaý qyzmetin kórsetedi eken.
Atalǵan shara barysynda álemniń 60-qa jýyq elin jasandy tósenishtermen qamtamasyz etip otyrǵan "ACT Global Sports" kompanııasy óz ónimderiniń tanystyrylymyn jasady.
"Búgingi kúni dúnıejúzi boıynsha sporttyq alańdardy jasandy tósenishtermen jabdyqtaýda bizdiń kompanııa kósh bastap tur. FIFA qazirgi tańda 5 kompanııanyń ónimin joǵary baǵalap, tańdaǵan bolatyn. Biz sol kompanııalardyń qatarynan tabyldyq. Óıtkeni bizdiń ónim barlyq halyqaralyq talaptarǵa saı", - deıdi "ACT Global Sports" kompanııasynyń basshysy Ýıl Dıtzel.
Onyń aıtýynsha, jasandy tósenishter túrli aýa raıy jaǵdaıyna, ıaǵnı, ystyq, sýyq klımatqa tótep beretin, ári sportshylardyń júgirýine de jaıly bolýy tıis. Tipten doptyń alańda erkin domalaýy da óte mańyzdy.
«Adiana Sport Story» JShS-niń dırektory Mádı Ospanov mundaı sharalardy ótkizý tájirıbe almasý men sońǵy úlgidegi jabdyqtardy paıdalanýda óte mańyzdy ekendigin aıtady. «Sport alańdaryn jańa qurylǵylarmen qamtamasyz etý sportshylarymyzdyń álemdik dodalarda joǵary nátıjeler kórsetýine septigin tıgizedi», - deıdi ol.
