Bizdiń maqsat - vıkıpedııany damytýmen qatar, ınternettegi qazaq tildi materıaldar qoryn ulǵaıtý - R.Kenjehanuly
ALMATY. 20 shilde. QazAqparat /Ádilet Musahaev/ - Bizdiń qordyń negizgi maqsaty - vıkıpedııany damytýmen qatar, ınternettegi qazaq tildi materıaldar qoryn ulǵaıtý. Bul jaıynda búgin WikiBilim jobasynyń jetekshisi Raýan Kenjehanuly Almatyda ótip jatqan «Internettegi qazaq tilin damytý joldary» taqyrybyndaǵy dóńgelek barysynda aıtty.
Qazaqsha vıkıpedııa jobasynyń iske asyp jatqanyna 1,5 aıdaı ýaqyt boldy. Vıkıpedııanyń ishinde qazaqsha bólimniń jumys istep kele jatqanyna 7 jyldaı ýaqyt bolǵan, onyń ishinde 7 myńdaı taza qazaq tilindegi maqalalar bolǵan edi. Osy qazaq vıkıpedııasyn damytý baǵytynda WikiBilim qory qurylǵan bolatyn. Qor jetekshisi R.Kenjehanulynyń aıtýynsha, qazir bul jobany damytýǵa memleket tarapynan da, jekeleı kompanııalardan qoldaýlar kórsetilýde.
"Biz jyl sońyna deıin qazaqsha materıaldardyń sanyn 200 myńǵa jetkizemiz degen edik, alaıda oǵan jetpeýi de múmkin. Degenimen adamdardyń osy saıtqa kirip, materıal berýi ulǵaıatyndyǵy belgili. Qazirgi kezde negizgi aýdıtorııamyz stýdentter men mektep oqýshylary bolǵandyqtan, olar ázir demalysta júr", -deıdi Qor jetekshisi.
Qazir bul joba aıasynda, Qazaq entsıklopedııasy bergen elektrondy maqalalardy salý isi júrip jatyr. Oǵan qosa áli aımaqtyq jáne salalyq entsıklopedııalar bar. "Bulardyń bárin qosqanda biz 80 myńnan asa almaımyz. Bul búgingi kúnde qolymyzda bar materıaldar. Qalǵandary ózge tilderden aýdarylyp keletin materıaldar bolýy tıis. Sondyqtan kópshiliktiń nazaryn ózimizge aýdartyp, bastaǵan isimizdi odan ári damytýymyz qajet", -dep atap ótti R.Kenjehanuly.
Qor jetekshisi sonymen qatar jýrnalısterge salynǵan materıaldardy synaǵan kezde olarǵa túsinýshilikpen qaraýdy ótindi. "Vıkıpedııany memleket nemese belgili bir top jasamaıdy, ony tek paıdalanýshylar jasaıdy. Eger ár adam soǵan kirip, ózderi bir-bir materıaldan salyp otyrsa, sapa da túzeler edi", -deıdi ol.
R.Kenjehanuly sondaı-aq qazaq tildi vıkıpedııany damytýǵa qazaq tilin jetik biletin mamandar, fılologtar, lıngvıster, sol salada kóp jyldardan beri jumys istep jatqan, termınkomdarǵa múshe adamdar, Almatydaǵy til bilimi ınstıtýty ókilderi tartylýy tıis, biraq olar qazirgi kúni qatty belsendilik tanytyp otyrmaǵandyǵyn aıtady. "Olar ınternettiń fılosofııasyn bile qoımas, degenimen qazaq sózderiniń uǵymyn, qurylymyn jaqsy biledi. Eger olar qatyspasa jasaǵan tirshiligimiz jasandy, ýaqytsha nemese orta qabyldamaıtyn dúnıe bolyp shyǵady", -deıdi WikiBilim jobasynyń jetekshisi.
