Bizdiń qyzmetti áıelderge arnalmaǵan deıdi – iz kesýshi Balǵyn Qarıeva
ALMATY. QazAqparat– Almaty oblysynda tájirıbeli izkesýshi áıel qyzmet etedi. Polıtsııa kapıtany Balǵyn Qarıeva qazaqstandyq qyz-kelinshekterdi 8 Naýryz merekesimen quttyqtady, dep habarlaıdy QazAqparat tilshisi.
Balǵyn Qarıeva stýdent kezinen pogon taǵyp, krımınaldyq polıtsııanyń jedel ýákili bolýdy armandaǵan. Ol óz maqsatyna jetý úshin aıanbaı eńbek etti.
Eńbek jolyn krımınalıstıkadan bastaǵan Balǵyn tabandy eńbeginiń arqasynda ofıtser degen ataqqa da qol jetkizdi. Jarty jyldan keıin jedel ýákil boldy. Sodan keıin, Qapshaǵaı qalalyq krımınaldyq polıtsııa bóliminiń aǵa jedel ýákili qyzmetine taǵaıyndalady. Eki jyldan keıin Balǵyn óziniń qaltqysyz jumysyn dáleldep, tergeýshi qyzmetine aýysty. Qazirgi ýaqytta ol krımınaldyq polıtsııanyń aǵa jedel ýákili qyzmetin atqarady. Osylaısha, ol segiz jyl ishinde armanyn aqıqatqa aınaldyra bildi.
«Kúndelikti qyzmet barysynda túrli adamdarmen tildesýge týra keledi. Ashý kerek qylmystardyń tizimi adam óltirý, tonaý, qaraqshylyq, urlyqpen shektelmeıdi. Sondyqtan da bul bólimdegi qyzmet názik jandarǵa arnalmaǵan dep jatady», - deıdi Balǵyn Qarıeva.
Bos ýaqytynda kapıtan Qarıeva jeńil atletıkamen kásibı aınalysady. Ol 2019 jyly respýblıkanyń úzdik polıtseıi «Parasatty polıtseı – 2019 jyl» ataǵyna ıe boldy.
«Óz áriptesterim polıtsııa qyzmetkerleri qataryndaǵy arýlarǵa mahabbat, baqyt, densaýlyq jáne otbasylaryna amandyq tileımin. Armandarńyzǵa jetýlerińizge tilektespin»,– dep qorytyndylady Balǵyn Qarıeva.
Aıta ketý kerek, Halyqaralyq áıelder kúni qarsańynda polıtsııa kapıtany Balǵyn Qarıeva QR ІІM-niń 2 dárejeli «Іshki ister organdarynyń úzdigi» tósbelgisimen marapattaldy .
