Bizdiń Konstıtýtsııa halyqaralyq standarttarǵa sáıkes, biraq onyń áleýeti áli kúnge deıin iske aspaýda - QR Prezıdenti janyndaǵy Adam quqyǵy jónindegi komıssııanyń hatshysy
ASTANA. Maýsymnyń 22-si. QazAqparat /Marlan Jıembaı/ - Bizdiń Konstıtýtsııa halyqaralyq standarttarǵa sáıkes, biraq onyń áleýeti áli kúnge deıin iske aspaı jatyr.
Bul pikirdi búgin QR Prezıdenti janyndaǵy Adam quqyǵy jónindegi komıssııanyń hatshysy Tastemir Ábishev «Qazaqstanda «Aqparatqa qol jetimdilik týraly» Zańdy qabyldaý: shynaıy jaǵdaıy jáne bolashaǵy» atty taqyryppen ótip jatqan sarapshylar kezdesýi barysynda málim etti.
Sarapshylar keńesinde Qazaqstan azamattarynyń aqparat alý quqyǵynyń saqtalýy qandaı deńgeıde, ony qalaı alady, tolyq álde jartylaı ala ma nemese múldem almaı ma degen máseleler kóterilip otyrǵandyǵyn atap ótken ol, «jalpy bizdiń Konstıtýtsııamyzda jaqsy norma bar. Bizdiń azamattar zańmen belgilengen tártippen ózderine qatysty aqparatty kez kelgen memlekettik organnan, qoǵamdyq uıymdardan jáne basqa da jerlerden alýyna bolady. Ókinishke oraı, Konstıtýtsııanyń osy normasy tájirıbede tolyq iske asqan joq», deıdi.
Osyny eskergen Adam quqyǵy jónindegi komıssııa 2009 jyly adam quqyǵyna qatysty ulttyq jospardy ázirlegen bolatyn. Bul qujatty Elbasy 2009 jyly mamyrdyń 5-inde bekitken edi. Osy josparda azamattardyń aqparat alý quqyǵyn qamtamasyz etý úshin arnaıy zań qabyldaý jóninde usynys engizilgen. «Mundaǵy negizgi maqsat - tek qana qazaqstandyq azamattar ǵana emes, sonymen birge elimizde zańdy turyp jatqan ózge de sheteldik azamattar bolsyn, azamattyǵy joq tulǵalar bolsyn zańmen belgilengen tártippen ózderine qatysty aqparattardy alý múmkinshiligimen qamtamasyz etý. Aqparatty tolyq ala almasańyz ózińizdiń quqyǵyńyzdy qorǵaı almaısyz jáne ózińizdiń alǵa qoıǵan maqsatyńyzdy iske asyra almaýyńyz múmkin. Sebebi, aqparat alý fýndamentaldy, ıaǵnı ómir súrý, densaýlyq saqtaý quqyqtary sııaqty negizgi quqyqtardyń biri bolyp sanalady», deıdi T.Ábishev. Sonymen qatar hatshy zańmen belgilengen tártippen keıbir qupııa málimetter nemese qyzmet babynda qoldanylatyn aqparattar azamattarǵa berilmeıtindigin de atap ótti.
«Búgingi kezdesýdiń maqsaty - el azamattarynyń, qazaqstandyqtardyń aqparat alý quqyǵyna qoljetimdiligin qamtamasyz etý, olardyń konstıtýtsııalyq quqyqtaryn júzege asyrý. Bizdiń Konstıtýtsııa halyqaralyq standarttarǵa sáıkes, biraq onyń áleýeti áli kúnge deıin iske aspaı jatyr. Sonyń biri azamattardyń aqparat alý quqyǵyna qatysty bolyp otyr», dedi óz sózinde QR Prezıdenti janyndaǵy Adam quqyǵy jónindegi komıssııanyń hatshysy.
