Bizdiń kók pasportymyzdy búkil álem tanıdy jáne qurmetteıdi - Toqaev

QARAǴANDY. QazAqparat –Qazaqstan Respýblıkasy azamatynyń pasporty irgeli qundylyqtardy bildiredi. Bul týraly Prezıdent Qasym-Jomart Toqaev Qaraǵandy oblysy jurtshylyǵymen kezdesýinde málim etti, dep habarlaıdy QazAqparat Aqordanyń baspasóz qyzmetine silteme jasap.

«Birlik, yntymaq, toleranttylyq, ózara qurmet, janashyrlyq jáne árqashan bir-birimizge qol ushyn berýge daıyn bolý bizdiń dástúrimiz ben mádenıetimizdiń negizinde jatyr. Bizdiń ulttyq bolmysymyzdy qalyptastyratyn bul biregeı qundylyqtardy jasandy ıdeologııalyq qurylymdarǵa telý ońaı emes. Biraq, meniń oıymsha, buǵan qajettilik joq. Qazaqstan Respýblıkasynyń kók pasporty bizdiń ulttyq biregeıligimizdiń qarapaıym, biraq basty kórsetkishi bolýy kerek ekenine senimdimin. Bul qujat – bizdiń memlekettiligimizdiń tiregine aınalǵan ozyq qaǵıdattardyń nyshany. Qazaqstan Respýblıkasy azamatynyń pasporty irgeli qundylyqtardy bildiredi. Sonyń arqasynda bizdiń elimiz búkil álemge etnosaralyq jáne dinaralyq toleranttylyqtyń jarqyn úlgisi retinde tanymal boldy. Qazaqstan pasporty – ádildiktiń jáne ulttyń bolashaqqa umtylysynyń sımvoly», - dedi QR Prezıdenti kezdesýde.

Sondaı-aq Memleket basshysy bizdiń kók pasportymyzdy búkil álem qurmetteıtinin jetkizdi.

«Bizdiń kók pasportymyzdy búkil álem tanıdy jáne qurmetteıdi. Shet memleketterdiń vızalaryn berýdi qosa alǵanda shetelde qazaqstandyq pasportqa qatysty qandaı da bir shekteýler joq. Bul – Ádiletti Qazaqstandy qurýǵa baǵyttalǵan elimizdiń teńgerimdi ári jaýapty syrtqy saıası baǵdary men ishki saıasatynyń tikeleı nátıjesi», - dep tolyqtyrdy Memleket basshysy óziniń sózin.