Bizdiń qoǵamnyń rýhy zamanaýı Qazaqstannnyń ulttyq ıdeıasymen tyǵyz baılanysty
ATY. 16 aqpan. QazAqparat /Názıra Eleýhan/ - Qazirgi zaman jastaryna patrıottyq tárbıe berý, rýhanı-adamgershilikti tulǵany qalyptastyrý, azamattyq kózqarasta tárbıeleý memlekettik mańyzǵa ıe.
Bul týraly búgin Almatyda Elbasynyń bıylǵy Joldaýynda kórsetilgen «ıntellektýaldy ult» qalyptastyrýda bilim jáne ǵylym salasyn damytý joldaryn talqylaýǵa arnalǵan «Qazirgi zaman jastaryna rýhanı-adamgershilik jáne patrıottyq tárbıe berý: tájirıbe, mazmun, damý bolashaǵy» atty respýblıkalyq ǵylymı-tájirıbelik konferentsııada Ál-Farabı atyndaǵy QazUÝ-diń rektory Ǵalymqaıyr Mutanov aıtty.
Atalmysh sharynyń uıymdastyrýshylary - QR Bilim jáne ǵylym mınıstrligi, Almaty qalasynyń ákimshiligi men Almaty qalasy Ardagerler keńesi jáne Ál-Farabı atyndaǵy QazUÝ. Konferentsııa jumysyna Almaty qalasy ákimshiliginiń, Almaty qalasy Ardagerler kenesiniń, JOO-lar men orta mektep ókilderi qatysty.
Konferentsııa barysynda QazUÝ rektory Ǵalymqaıyr Mutanov: «Elbasy Nursultan Nazarbaevtyń jyl saıynǵy Joldaýy áleýmettik modernızatsııaǵa, adam kapıtalynyń qalyptasýy men damýyna jaǵdaı jasaýǵa arnalýmen erekshelenedi. Joldaýda qoıylǵan eń basty mindetti oryndaı otyryp - sapaly maman daıarlaýda biz qoǵam aldynda rýhanı-adamgershilikke baı tolyq tulǵanyń qalyptasýyna jaýapty ekenimizdi umytpaýymyz kerek. Elimizge el ekonomıkasyn joǵary deńgeıge damytatyn, bilimdi kásibı tulǵalar, ónegeli, óz eli men mádenıetin súıetin patrıot jastar qajet», - dep atap ótti.
Almaty qalasy ákiminiń orynbasary Serik Seıdýmanovtyń aıtýynsha, bizdiń qoǵamnyń rýhy zamanaýı Qazaqstannyń ulttyq ıdeıasymen tyǵyz baılanysty. «Elimiz táýelsizdiktiń 20 jyldyǵyna aıaq basty. Osy jyldar aralyǵynda halyqpen dańqty joldar jasaldy, el senimdi jáne qarqyndy damydy. Jas býyn elimizdiń jetken osy jetistikterin baǵalap, onyń mańyzdylyǵyn túsinýleri qajet jáne otan úshin aıanbaı eńbek etýge talpynýlary kerek»,-dedi ol.
Konferentsııa barysynda qatysýshylar pedagogtarǵa, memlekettik jáne qoǵamdyq ınstıtýttardyń ókilderine, ata-analarǵa jastar boıyndaǵy patrıottyq sezimdi tárbıeleý isine atsalýǵa shaqyrdy.
