Bizdiń ekonomıkamyzǵa postındýstrııalyq formatsııanyń ınjenerleri kerek - Elbasy
ASTANA. 7 jeltoqsan. QazAqparat - Bıyl oqýǵa túsken stýdentterdiń kóbisi birjyldyq bazalyq kýrstan keıin ınjenerlik mamandyqtarǵa oqýdy josparlap otyr eken, bul jaǵymdy jańalyq, dep atap kórsetti Elbasy Nursultan Nazarbaev búgin «Nazarbaev Ýnıversıtetinde» oqyǵan dárisi kezinde.
«Qazirgi tańda elimizde jalpy somasy 50 mıllıardtaı dollardyń ındýstrııalyq jobalary júzege asyrylýda. Tek qana aǵymdaǵy jyldyń ózinde 150-ge jýyq ónerkásip nysany iske qosylady. Óńirlerdi qosa eseptegende, olardyń sany birneshe júzdegen nysanǵa jetip qalady.
Elimizdiń ınnovatsııalyq ınfraqurylymyna bes damý ınstıtýty, toǵyz tehnopark kirip otyr, jáne taǵy eki konstrýktorlyq bıýro bar, oǵan qosa bıyl taǵy úsh osyndaı bıýro salynady», dep atap kórsetti Elbasy óz sózinde.
«Ol kásiporyndar, ınstıtýttar men konstrýktorlyq bıýrolar osy ýnıversıtettiń bolashaq túlekterin kútedi, onyń ústine bıyl oqýǵa túsken stýdentterdiń kóbisi birjyldyq bazalyq kýrstan keıin ınjenerlik mamandyq boıynsha bilimderin ushtaýdy josparlap otyr eken. Bul men úshin jaǵymdy jańalyq. Bul durys tańdaý. Bizdiń ekonomıkamyzǵa postındýstrııalyq formatsııanyń ınjener kadrlary qajet-aq»,- dedi Prezıdent óz sózinde.
