Bizdiń býyn qolynan kelgenniń bárin jasady - Nursultan Nazarbaev

NUR-SULTAN. QazAqparat - Qazaqstan halqy jastarǵa qatty senedi. Jas býyn osy senimdi aqtaýy kerek. Nazarbaev Ýnıversıtetinde oqý bitirip jatqan túlekterdiń aldynda QR Tuńǵysh Prezıdenti - Elbasy Nursultan Nazarbaev osylaı dedi, dep habarlaıdy QazAqparat tilshisi.

«Biz jastarǵa qatty senemiz. Sebebi, Qazaqstannyń bolashaǵyna senemiz. Sol sebepti, sizderdiń árqaısylaryńyz - bizdiń halyqtan orasan zor senim nesıesin aldy, tolyqqandy qamtyldy dep málimdeı alamyn. Elimizde álemdik deńgeıdegi ýnıversıtet turǵyzýǵa orasan zor halyqtyń aqshasy ketti. Búgin de qoǵamnyń jáne meniń - sizder Otan úshin ter tóger dep úmittenýge tolyq qaqymyz bar. Sizderdiń Otanǵa degen súıispenshilikterińiz - el ıgiligi úshin jasalǵan jaqsylyqpen ólshenedi. Sizder - basqa JOO túlekteri úshin úlgisizder. Sol sebepti, sizder tek joǵary sanatty maman ǵana emes, qoǵamnyń belsendi múshesi bola bilýge tıissizder», - dedi Elbasy Nazarbaev Ýnıversıtetinde túlekterdiń aldynda.

Nursultan Nazarbaev el saıasatynyń arqasynda Qazaqstandy álem syılaıtynyn atap ótti.

«Sizder Qazaqstannan kelgenderińizdi aıtsańyzdar - shetelde sizderdi jyly qabyldaıtyn bolar. Solaı ma!? Mine, biz osyny kózdedik. Qandaı joldy tańdasańyzdar da - jarqyn jol tileımiz. Qazaqstan - árdaıym damyp kele jatqan el. Biz óz táýelsizdigimizdiń 28 jyldyq belesine aıaq bastyq. Bylaı qarasań, tarıh úshin tym qysqa ýaqyt. Biraq, ótken joldy saraptap, qıyndyqtardy eńserý dańǵylyna qarasaq - bizdiń sarapshylar osy 28 jyldy 100 jylmen salystyrady. Solaı da shyǵar. Sebebi, qazaqtar men Qazaqstannyń burynǵy tarıhyn sońǵy 28 jyldyq kezeńmen salystyrar bolsaq, shynynda da, orasan zor eńbek etkenimizdi baıqaımyz», - dedi Nursultan Nazarbaev.

Elbasy óz sózinde qazaqtar eshqashan búgingideı ómir súrmegenin aıtyp ótti.

«Bizdiń býyn óz sharýasyn bitirip, elge eńbegin berip, qolynan kelgenniń bárin jasady dep aıta alamyn», - dedi Elbasy.

Eske sala ketsek, Nazarbaev ýnıversıtetinde saltanatty túrde V oqý bitirý rásimi ótip jatyr. Bıyl atalmysh ýnıversıtettegi túlekter sany - 963 stýdent. Onyń ishinde 565 stýdent - bakalavrıat, 378 stýdent - magıstratýra, 14-i - medıtsına doktory jáne 6 stýdent - doktorantýra baǵdarlamasy boıynsha oqý bitirip jatyr.

Túlekterdiń kópshiligi - Ǵylym jáne tehnologııalar mektebiniń (270 túlek), Injenerııa mektebiniń (225 túlek), Gýmanıtarlyq jáne áleýmettik ǵylymdar mektebiniń (168) bakalavrıat baǵdarlamasynyń stýdentteri. Magıstrlik baǵdarlama boıynsha Joǵary bıznes mektebin - 82 stýdent, Joǵary bilim berý mektebin - 80 túlek, Joǵarǵy memlekettik saıasat mektebin - 49 túlek, Injenerııa mektebin - 70 túlek, Ǵylym jáne tehnologııalar mektebin - 34 túlek, Gýmanıtarlyq jáne áleýmettik ǵylymdar mektebin - 19 túlek, Medıtsına mektebin - 27 túlek, Taý-ken isi jáne Jer týraly ǵylym mektebin - 20 túlek aıaqtaǵan.