Bizdiń býyn qazaqtyń tarıhyn tereń bilmeı ósti – N.Nazarbaev
BEIJІŃ. QAZAQPARAT - QR Prezıdenti Nursultan Nazarbaev «Dıaoıýıtaı» Qytaı memlekettik rezıdentsııasyndaǵy baspasóz máslıhatynda Qazaq handyǵy 550 jyldyǵyn toılaýdyń mańyzy týraly sóıledi.
«Biz, qazaq halqy, tarıhymyzdy, mysaly, meniń zamandastarym men keıin kele jatqan iniler naǵyz qazaqtyń tarıhyn bilmeı óstik. Qazaqstannyń tarıhy Reseıdiń tarıhymen birge nemese Qazan revolıýtsııasynan bastalatyn. Onyń ishinde qazaqtyń tarıhy degen pán mektepte de, esh jerde de oqytylǵan joq. Biraq biz qazaq aspannan salbyrap túskenimiz joq ǵoı, bizdiń ata-babalarymyz bar (...) sol úshin qan tókken, ter tókken (...) Meniń oıymsha, bizdiń jas urpaqqa Qazaqstannyń tarıhy qandaı ekenin, tereńnen kele jatqanyn bildirýimiz kerek», - dedi Memleket basshysy qazaqstandyq jýrnalısterdiń saýalyna jaýap berý kezinde.
N.Nazarbaev Qazaqstan tarıhynda ǵundar, saqtar, úısinder, Túrik qaǵanaty, onyń ekige bólinýi (batysy - Túrkııa, Ázerbaıjan, Túrkmenistan aýmaǵy, shyǵysy - qazirgi Qazaqstan), Shyńǵyshannyń handyǵy, Altyn Orda jáne taǵy basqa kezeńderdiń bolǵandyǵyn eske saldy.
«Sonyń barlyǵyn bilý kerek jastarǵa. «Qaıdan keldiń, qaıdan shyqtyń?» degende, olar bizdiń tarıhymyz tereńde jatqandyǵyn bilýi tıis. Sondyqtan da Qazaq handyǵynyń 550 jyldyǵyn atap ótý qajet jáne durys bolady dep esepteımin», - dedi Prezıdent.
Sondaı-aq Elbasy Taraz ben Astanada merekelik sharalardyń ótkiziletindigin aıtyp ótti.
Eske sala keteıik, keshe N.Nazarbaevtyń Qytaıǵa jasaǵan memlekettik sapary aıasynda QHR Tóraǵasy Sı Tszınpınmen, úsh qytaılyq korporatsııanyń (CNPC, CITIC Group, Qinghua) basshylarymen kezdesýleri ótip, 12 ekijaqty qujatqa qol qoıylǵan bolatyn.
Sapar 3 qyrkúıekke deıin jalǵasady. Búgin QHR Memlekettik keńesiniń Premeri Lı Ketsıanmen kezdesý ótedi. Beısenbi kúni QR Prezıdenti qytaı halqynyń japondyq basqynshylarǵa qarsy kúresi soǵysyndaǵy Jeńisiniń 70 jyldyǵyna arnalǵan saltanatty paradqa qatysady.
Sadyq Ákijanov
