Bizdiń baǵytymyzdyń, reformamyzdyń durys jolda kele jatqandyǵyna elimizdiń jetken jetistigi dálel bola alady - J. Tóregeldınov
ALMATY. 28 aqpan. QazAqparat /Názıra Eleýhan/ - Halqymyzdyń áleýmettik ekonomıkalyq jaǵdaıyn jaqsartý úshin, biz jumyssyzdar sanyn qysqartyp, onyń deńgeıin eń keminde 5 paıyzǵa deıin azaıtýymyz qajet.
Bul iske bizdiń ǵana emes, árbir qazaqstandyqtyń atsalysýy kerek. Bul týraly búgin Almatyda M.Tynyshbaev atyndaǵy Kólik jáne kommýnıkatsııa akademııasynda QR Parlament Senatynyń depýtaty Jumabek Tóregeldınov Elbasynyń Qazaqstan halqyna Joldaýyn nasıhattaýǵa arnalǵan kezdesý barysynda aıtty.
Jıynǵa atalmysh oqý ornynyń rektory Ádilbek Botabekov, akademııanyń ustazdary men stýdentter qaýymy qatysty. Kezdesýde Elbasy Joldaýy talqylanyp, stýdentter Parlament Senatynyń depýtatyna óz saýaldaryn qoıdy.
«Elbasy «Bolashaqtyń irgesin birge qalaımyz!» atty Qazaqstan halqyna Joldaýynda, 2020 jylǵa deıin elimizdiń ekonomıkalyq jańǵyrtý jáne áleýmettik modernızatsııalaýǵa qatysty, birneshe basym baǵyttardy atap ótti. Onda halqymyzdyń ál-aýqatyn jaqsartyp, densaýlyq saqtaý júıesin jetildirýge, bilim sapasyn arttyrýǵa, sapaly aýyzsýmen qamatamasyz etýge, turǵyn úı máselelerin sheshýge kóp kóńil bólingen. Bizdiń baǵytymyzdyń, usynylǵan reformamyzdyń durys jolda kele jatqandyǵyna elimizdiń jetken jetistigi dálel bola alady»,-dedi ol kezdesýde.
Ár sala boıynsha Joldaýda kórsetilgen basty mindetterdi, jetken jetistikterimizdi atap ótken depýtat: «Joldaý eń aldymen jastarǵa, myna Sizderge baǵyttalǵan. Biz salǵan joldy iske asyratyn sizdersizder. Bolat jol magıstraliniń bolashaq mamandarynyń aldynda úlken mindetter tur. Olar - otandyq aýyr jáne jyljymaly quramalardy shyǵarý men jóndeý, jyldam, tez júretin temirjol magıstraldarynyń qurylysyn júrgizý, elimizdiń tranzıttik áleýetin iske asyrý jáne taǵy da basqa mindetter bar. Osy otyrǵandardyń birine jaqyn arada joǵary jyldamdyqta júretin poıyzdyń, Almaty men Astanany jalǵastyratyn temirjol qurylysyna qatysý múmkindigi tur. Ol aralyqtyń uzaqtyǵy 4 saǵat bolmaq. Ol árıne, joǵary, jańa bilikti mamandardy qajet etedi. Sondyqtan, taıaý ýaqytta osy poıyzdyń qozǵalysyn qamtamasyz etý sizderge, jas jáne bilikti mamandarǵa júkteletin bolady»,-dedi Senat depýtaty.
M. Tynyshbaev atyndaǵy Qazaq kólik jáne kommýnıkatsııalar akademııasynyń rektory Ádilbek Botabekov: «Qańtar aıynyń sońynda muǵalimderdiń, akademııa qyzmetkerleri men stýdentteriniń qatysýymen májilis ótkizip, Elbasy Joldaýyn talqyladyq, oı-pikirimizdi gazet basylymdaryna aıtyp jatyrmyz. Sonymen qatar, stýdentter arasynda dóńgelek ústel otyrystary da ótti»,-dedi.
Kezdesýde Jumabek Tóregeldınov sonymen qatar, Úkimette «Stýdenttik turǵyn úı» baǵdarlamasy jasalynyp jatqandyǵyn aıtty.
