Bizdiń aýlamyzda oıyn alańy qashan salynady - almatylyq balalar jelide qala basshylyǵyna júgindi

ALMATY. QazAqparat - Almatylyq balalar áleýmettik jelide úıleriniń aýlasynda oıyn alańy joq ekenin aıtyp, qala basshylyǵyna shaǵymdandy, dep habarlaıdy QazAqparat tilshisi.

«Jaz keldi, kanıkýl bastaldy... Al bizdiń aýlamyzda balalar oıyn alańy joq. Sonda biz qaıda oınaımyz? Sizder bizge «keshke deıin sotka qarama» deısizder, al dalaǵa shyǵyp oınaıyq desek, úıdiń aýlasynda balalar oıyn alańy joq. Sonda biz qaıtpekpiz», - dedi balalar.

Sondaı-aq, jelidegi jazbada: «Medeý aýdanynyń sheneýnikteri 1 maýsymǵa deıin Tólebaev kóshesindegi 27 jáne Nazarbaev dańǵylyndaǵy 44 úılerdiń aldyndaǵy balalar alańyn jóndeýge ýáde bergen edi, alaıda, ýádelerin oryndamady», - delinedi.
Atalǵan másele boıynsha Medeý aýdanynyń ákimdigi túsinik berdi. Ákimdikte Nazarbaev dańǵyly, 44-úı mekenjaıyndaǵy aýlanyń aýmaǵyn jóndeý bıyl «Halyqqa qatysý bıýdjeti» baǵdarlamasyn iske asyrý sheńberinde josparlanǵanyn habarlady.
«Sáýir aıynda konkýrstyq rásimder aıaqtaldy, 1 mamyrda»KazInvestStorı«JShS merdigerlik uıymy jóndeý jumystaryna kiristi. Búgingi tańda atalǵan meken-jaı boıynsha aǵashtardy sanıtarlyq kesý, oıyn alańyn demontajdaý jumystary jasaldy, sondaı-aq jańa bordıýrler qoıylyp, asfalttaý jumystaryn júrgizý úshin ýchaskeni tazartý jumystary júrgizildi. Qazirgi ýaqytta balalar oıyn keshenderi, oryndyqtar men ýrnalardy jetkizý kútilýde. Jumystar jospar boıynsha shilde aıynda aıaqtalýy tıis», - dep jaýap berdi Medeý aýdany ákimdiginiń baspasóz qyzmeti.
Sondaı-aq bıyl Medeý aýdany boıynsha «Halyq qatysatyn bıýdjet» baǵdarlamasy men josparǵa sáıkes aýlalardy aǵymdaǵy jóndeý jumystary aıasynda 100-ge jýyq aýla jóndelip, jumystar 5 maýsymda bastalýy tıis.
«Jelide aıtylǵan jumystardyń aıaqtalý merzimin Medeý aýdanynyń ákimdigi habarlamaǵan. Sebebi, aýlalardy jóndeý jumystary mamyr-maýsym aılarynda barlyq konkýrstyq rásimder aıaqtalǵan soń bastalyp, úsh aı ishinde oryndalady», - dep habarlady Medeý aýdanynyń ákimdigi.