Bizdiń apparat ashyq rejımde jumys isteýge daıyn - OSK tóraǵasy
«EQYU DIAQB uıymyna Qazaqstandaǵy saılaý naýqandaryna únemi nazar aýdaratyndyǵy úshin alǵys aıtamyn. Mıssııanyń elimizdegi kezekti saılaý barysyn baqylaıtyndyǵyna qýanyshtymyz. Byltyr 20 qarashada ótken prezıdent saılaýynda EQYU DIAQB mıssııasynyń 300-den astam ókili jumys istedi. Delegatsııanyń keıbir múshelerin jaqsy tanımyz. Sizderdiń Qazaqstanǵa kelýlerińiz barlyq jaǵynan da jemisti bolady dep senemin», - dedi Nurlan Ábdirov kezdesý barysynda.
Sondaı-aq, OSK basshysy saılaý kezinde mıssııanyń tolyqqandy jumys isteýi úshin barlyq jaǵdaıdyń jasalatynyn aıtty.
«Bizdiń apparat ashyq ári ádil rejımde jumys isteýge daıyn. Biz ashyqpyz jáne qoljetimdimiz», - deıdi ol.
Sózin qorytyndylaı kele, Nurlan Ábdirov sheteldik meımandarǵa Ortalyq saılaý komıssııasynyń múshelerin jeke tanystyrdy.
«Mıssııa basshysy retinde Qazaqstandaǵy saılaý barysyn baıqaý – men úshin úlken mártebe. Sońǵy bir jyl ishinde Ortalyq saılaý komıssııasy birneshe mańyzdy saıası naýqandy ótkizgenin bilemin. EQYU DIAQB mıssııasy atynan ekijaqty yntymaqtastyǵymyz úshin Ortalyq saılaý komıssııasyna alǵys aıtamyn. Jumys kezinde jasalǵan barlyq jaǵdaı men múmkindikter úshin de rahmet», - dedi EQYU/DIAQB Qazaqstandaǵy parlamenttik saılaýdy baıqaý jónindegi mıssııa basshysy Oýen Merfı.
Buǵan deıin EQYU mıssııasy Májilis saılaýyn baıqaý jumysyn bastaıtyny týraly habarlaǵan edik. Mıssııa baıqaýshylary jumysyn 7 aqpanda bastap, 29 naýryzda aıaqtamaq.
Bul týraly QR Syrtqy ister mınıstriniń orynbasary Roman Vasılenkonyń EQYU Demokratııalyq ınstıtýttar jáne adam quqyqtary jónindegi bıýrosynyń (EQYU DIAQB) Qazaqstandaǵy parlamenttik saılaýdy baıqaý jónindegi mıssııa basshysy Oýen Merfıdi qabyldaýy barysynda belgili boldy.
