Bizdi kóp synaıdy, biraq odan qorqyp jatqanymyz joq – Shámshıdınova
NUR-SULTAN. QazAqparat – Pedagog óz logıkasyn damytýǵa, kóshbasshylyq daǵdylaryn qoldanýǵa, ınnovatsııalardy shyǵarmashylyq jolmen engizýge múddeli bolýy kerek. Bul týraly elordada ótip jatqan «Nazarbaev Zııatkerlik mektepteri» uıymdarynyń «Mektep álemin ózgertetin – ustazdar» halyqaralyq konferentsııasynda aıtyldy, dep habarlaıdy QazAqparat tilshisi.
«Tek qana pándi bilip qoıý – jetkiliksiz. Muǵalim aldymen ózine-ózi senýi tıis. Ol barlyq oqýshynyń oqyp, damı alatynyna senýi kerek. «Balanyń deńgeıi osydan artpaıdy» dep birjaqty baǵalaýǵa bolmaıdy. Muǵalim óz áreketi arqyly oqýshyny túsinip, qoldaı alatynyn kórsete bilýi qajet», - deıdi «Nazarbaev Zııatkerlik mektepteri» Derbes bilim berý uıymynyń Basqarma tóraǵasy Kúlásh Shámshıdınova.
Atap ótilgendeı, pedagogtyń mádenı-ıntellektýaldyq deńgeıiniń joǵary bolýy asa mańyzdy.
«Mádenı zııat deńgeıi joǵary mamandar ómirdegi jáne jumystaǵy qıynshylyqtarǵa barynsha moıymaı, tıimdi sheshim qabyldaıdy. Muǵalimniń óz zııatkerlik quzyretin damytyp otyrýǵa múmkindigi bolýy tıis. Ol logıkasyn damytýǵa, kóshbasshylyq daǵdylaryn qoldanýǵa, ınnovatsııalardy shyǵarmashylyq jolmen engizýge múddeli bolýy kerek. Ómir boıy bilim alý oqýshylar úshin ǵana emes, ustazdar úshin de mańyzdy», - deıdi «Nazarbaev Zııatkerlik mektepteri» DBBU tóraǵasy.
Sondaı-aq, Kúlásh Shámshıdınova muǵalim ózin tek qyzmet kórsetýshi ǵana emes, oqýshynyń áleýmettik, mádenı jáne tildik tájirıbesin eskerip, olardyń bilim alýyna oń yqpal etetin ózgeristerdi qozǵaýshy kúsh retinde sezinýi tıis ekenin tilge tıek etti.
«Nazarbaev Zııatkerlik mektepteri» elimizdiń bilim berý júıesinde jańartylǵan bilim berý mazmunyn engizý jaýapkershiligin ózine ala aldy. Ózderińiz bilesizder, 2016 jyldan beri osy máselege baılanysty bizdi kóp synap jatyr. Odan qorqyp otyrǵan joqpyz. Sebebi biz óz mamandarymyzǵa senemiz», - dedi ol.
Eske sala ketsek, elordada myńnan astam pedagogtyń qatysýymen «Nazarbaev Zııatkerlik mektepteri» uıymdarynyń «Mektep álemin ózgertetin – ustazdar» halyqaralyq ǵylymı-tájirıbelik konferentsııasy ótti.
Onda QR Bilim jáne ǵylym vıtse-mınıstri Sholpan Karınova bilim salasyndaǵy basty strategııalyq baǵyttardyń biri – «Nazarbaev Zııatkerlik mektepteriniń» tájirıbesin Qazaqstandaǵy jalpy bilim berý mektepterine taratý ekendigin aıtty.
Sondaı-aq, «NZM» Derbes bilim berý uıymynyń basqarma tóraǵasy Kúlásh Shámshıdınova qazirgi muǵalimder qandaı bolýy kerektigin aıtty.
