Bizder tek retsessııanyń aldyn alyp qana qoıǵanymyz joq, ekonomıkanyń ósýine qol jetkizdik - QR Prezıdenti

ÓSKEMEN. Qańtardyń 29-y. QazAqparat /Lıýdmıla Malko/ - Elimizde 730 shaqyrym - elektr jelileri, 1000 shaqyrymnan astam - sýmen jabdyqtaý jelileri jáne 280 shaqyrym jylý jelileri jóndeýden ótkizildi. «Jol kartasy» baǵdarlamasynyń arqasynda avtomobıl joldarynyń úshten biri, júzdegen mektepter men aýrýhanalar, mádenıet jáne sport nysandary jóndeýden ótkizildi.

Bul jóninde búgin QR Prezıdenti Nursultan Nazarbaev óziniń kezekti Qazaqstan halqyna Joldaýynda aıtty.

Memleket basshysy bul jalań sandar bolyp kóringenimen, qyrýar jumystardyń atqarylǵanyn atady.

«Sizder jaqsy bilesizder, ózderińizge adamdardyń qanshalyqty rıza bolǵanyn, - dedi Elbasy Parlament qos palatasynyń depýtattaryna. - Mundaı jumystardy bizder alǵash ret ótkizdik jáne ony jaqsy atqardyq. Barlyǵy da meniń jáne Úkimettiń baqylaýymen jedel jáne jarııa túrde ótti. Bizder tek retsessııanyń aldyn alyp qana qoıǵanymyz joq, ekonomıkanyń 1,1 paıyzǵa jáne ónerkásiptiń 1,7 paıyzǵa ósýine qol jetkizdik».

Memleket basshysy Turaqtandyrý qory aktıvteriniń 50 mlrd. AQSh dollarynan asqanyn jáne sońǵy 10 jylda 25 ese óskenin atady.

Memleket basshysy «Jol kartasy» baǵdarlamasynyń eldi damýdyń jańa kezeńine shyǵarý boıynsha jańa onjyldyqtaǵy alda turǵan úlken jumystyń ózindik daıarlyǵy bolǵanyn atady.