Bizder, ǵalymdar Elbasynyń ókilettigin uzartý jónindegi referendýmdy qoldaımyz jáne ony nasıhattaý úshin qyzmet etemiz - akademık Á.Nysanbaev
ALMATY. 17 qańtar. QazAqparat /Ádilet Musahaev/ - "Prezıdentimiz N.Á. Nazarbaev «Qazaqstan-2030» strategııalyq baǵdarlamasyn usynǵaly beri sol baǵdarlamany kezeń-kezeńimen tabysty iske asyryp kele jatyrmyz", -dedi QR UǴA-nyń akademıgi, Fılosofııa jáne saıasattaný ınstıtýtynyń dırektory Ábdimálik Nysanbaev Almatyda arnaıy ótken baspasóz máslıhatynda.
Onyń aıtýynsha, Elbasynyń basshylyǵymen atalǵan strategııanyń alǵashqy kezeńi, ıaǵnı onjyldyǵy óte sátti aıaqtaldy. Úlken álemdik ekonomıkalyq daǵdarystan da aman-esen shyqtyq. «Elimizde ekonomıkalyq ósý bar. Prezıdentimizdiń qol jetkizgen jetistiginiń eń negizgisi - Qazaqstanda túbirinen jańa demokratııalyq memleket ornady», -deıdi akademık.
Sonymen qatar ol Prezıdentimizdiń úlken negizge alatyn qaǵıdasy - turaqtylyq ekeninin alǵa tartady. «Etnostardyń, halyqtardyń, mádenıetterdiń, dinder arasynda ornaǵan turaqtylyq, kelisim jáne yntymaqtastyqtyń mańyzy zor. Munyń bári bolmaǵan jerde damý da, eshqandaı reforma da bolmaýshy edi. Qazaqstannyń EQYU-ǵa tóraǵa bolyp, Astanada Sammıt ótkizýiniń ózi de osy turaqtylyqqa, kelisimge baılanysty bolyp otyr. Munyń halyqaralyq úlken mańyzy bar. Osyny bizdiń Elbasymyz óziniń strategııasyna negiz etip aldy», -dep atap ótti óz sózinde Á.Nysanbaev.
Sondaı-aq ǵalym Prezıdentimizge eshqandaı balama joq ekendigin, shetelge shyqqanda, elimizdi aralaǵanda halyqtyń barlyǵy Elbasynyń bedeliniń joǵary ekendigin aıtatynyn atap ótti. «Endi aldymyzda 2020 jylǵa deıingi strategııanyń ekinshi kezeńi kútip tur. Bul aralyq elimizdiń tarıhy úshin mańyzdy, sheshýshi ról atqarady. Eger osy onjyldyqty jaqsy ótkerip, ındýstrııaldy-ınnovatsııalyq baǵdarlamalardy iske asyratyn bolsaq, keremet dáýletti memleket ornatamyz. Ol úshin jańa prezıdent izdeýdiń qajeti joq. Sebebi Nursultan Ábishulynyń densaýlyǵy myqty, oı-órisi keń, qazir álem moıyndaǵan tulǵa. Osy sabaqtastyq qaǵıdany jalǵastyryp, 2020 jylǵa deıin sol kisiniń basshylyǵymenn biz keremet jetistikterge jetemiz dep oılaımyn», -deıdi akademık.
