Bizdegi tarıh ınstıtýttary saıasattanyp ketken - Qazaq gýmanıtarlyq zań ýnıversıtetiniń professory
ALMATY. Qyrkúıektiń 21-i. QazAqparat /Erlik Erjanuly/ - "Biz abyr-sabyrmen áli tarıhymyzdy tarazylaı qoıǵan joqpyz". Bul týraly Qazaq gýmanıtarlyq zań ýnıversıtetiniń professory, saıası ǵylymdar doktory Ábdijálel Bákir QazAqparat tilshisine bergen suhbatynda aıtty.
"Qoǵam jáne memleket qaıratkerleriniń otyrǵan kreslosyna qarap baǵalamaý kerek. Olar naqty halqyna ne berdi, ne istedi degen baǵytta jumystaryn qarap, eńbegin elep-eskerip otyrsaq halyq úshin bul tálim-tárbıe mektebi bolar edi. Óıtkeni ótkenińdi bilmeı, odan sabaq almaı bolashaǵyńdy jasaı almaısyń", deıdi Ábdijálel Qoshqaruly. Saıasattanýshy ǵalymnyń paıymdaýynsha, Óziniń otyrǵan kreslosy men, alǵan aılyǵy úshin qyzmet jasaǵan adam qaıratker emes. Óziniń qyzmetin halyqtyń maqsat-múddesi men arman-tilegimen baılanystyryp, zamanynan ozyńqyrap, halqynyń bolashaǵyn oılaǵan jáne sol úshin kúresken adamdy ǵana qaıratker deýge bolady. Ókinishke oraı bizdegi tarıh ınstıtýttary qazir saıasattanyp ketken. Olar kim ne istedi dep tarıhty elep-eksheýge bara bermeıdi.
"Qazaqqa qyzmet jasaǵandardy búgingi qazaq izdeýi kerek emes pe? Men Muhemedǵalı Álenuly Sýjıkovtyń ómirin birsypara zerttedim. Sondaǵy baıqaǵanym ol halyq múddesi úshin ózi qyzmet jasaǵan keńestik júıemen biraz jerde qaıshylyqqa da barǵan. Ol Semeıdegi synaq polıgony týraly Almaty men Máskeýdegi Ortalyq komıtet basshylaryna 1959 jyly hat joldaıdy. Al 1960 jyly Temirtaý oqıǵasy týraly Ortalyq komıtettiń plenýmy bolǵanda ulttyq erekshelikterimizdi jáne jerimizdiń jaǵdaıyn bilmeıtin kadrlardy syrttan alyp kelýde respýblıkanyń saıası bıýrosy nege buǵan parasattylyq jasamaıdy dep synǵa alady. Asa qupııa ustalyp kelgen synaq polıgonnyń zardaby týraly eń alǵashqy bop másele kótergen onyń bul "ultshyldyq" málimdemesin Máskeýden arnaıy kelgen 3 ınspektor 3 aı boıy tekseredi. Jumysynan kináret taba almasa da, synyqtan syltaý izdegender aqyry ony Semeı oblystyq partııa komıtetiniń 1-shi hatshysy qyzmetinen bosatyp tyndy. Ókinishke qaraı, qyrkúıektiń 15-inde ómirge kelgenine 100 jyl tolǵan bul azamattyń ómiri men qyzmetinen kópshilik qaýym áli habarsyz", deıdi professor Ábdijálel Bákir.
