Bizde úsh bólek zań bolýy qajet - professor M.Qoǵamov
ANA. 5 qarasha. QazAqparat /Arman Asqarov/ - Búgin Astanadaǵy Qazaq gýmanıtarlyq zań ýnıversıtetinde «Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyǵy aıasynda aımaqtardyń turaqty damýynyń negizi retinde jergilikti ózin-ózi basqarý» taqyrybynda halyqaralyq ǵylymı-tájirıbelik konferentsııa bastaldy.
Ǵylymı májilis barysynda Qazaq gýmanıtarlyq zań ýnıversıtetiniń rektory, professor Marat Qoǵamov atap kórsetkendeı, Ata zańymyz - Kazaqstan Respýblıkasy Konstıtýtsııasyna sáıkes, búgingi tańda elimizde máslıhattardyń jumysyn uıymdastyrý, jergilikti atqarý jáne jergilikti ózin-ózi basqarý organdaryna arnalǵan bólek úsh zańdy qabyldaý qajet. «Men bizdiń Ata zańymyz - Konstıtýtsııany zerdeleı otyryp, myna bir oı-túıinge keldim. Bizde úsh bólek zań bolýy qajet. Birinshi, jergilikti máslıhattardyń jumysyn uıymdastyrýǵa arnalǵan zań, ekinshi, jergilikti atqarý organdary jáne úshinshi, jergilikti ózin-ózi basqarý organdaryna arnalǵan zańdy qabyldaý kerek. Bizdiń zańnamada jergilikti ózin-ózi basqarý degen sóz bar. Demek, aldaǵy ýaqytta joǵaryda atalǵan úsh zań qabyldanady degen boljam bar. Ol, árıne, úkimetke jáne zań shyǵarýshy organdarǵa tikeleı baılanysty. Negizi, bizde barlyq bıliktiń qaınar kózi - halyqta. Biraq halyq sol bılikti óz deńgeıinde iske asyra almaı jatyr», - deıdi M.Qoǵamov.
