Bizde tarıhnamalyq maqalalar maqtaýǵa arnalǵan mereıtoılyq materıaldar bolyp barady - tarıhshy Talas Omarbekov
ALMATY. 16 qarasha. QazAqparat /Erlik Erjanuly/ - Tarıhshy aǵa býynnyń "biraq" deıtin tustary az emes. Tarıhnamany damytýda endi bar úmit jastarda. Bul búgin Almatyda «Qazaqstan tarıhy: jańa ǵylymı-ádistemelik kózqaras jáne zertteý nátıjeleri" degen taqyrypta ótken «Temirqazyq» ulttyq sarapshylar klýbynyń otyrysynda aıtyldy.
"Bizdegi tarıhnamalyq maqalalardy oqyp otyrsań myna kisi bárin jazyp qoısa, jazatyn eshteńe qalmaǵan eken ǵoı dep oılaısyń. Árıne, aǵa býynnyń eńbegin elep-eskergen durys, degenmen tek maqtap qana qoımaı mynany jasaı almady, mynadaı kózqarasymen biz kelispeımiz degen syn da kerek. Ony jaza almaı júrmiz", - deıdi ál-Farabı atyndaǵy Qazaq ulttyq ýnıversıtetiniń professory, tarıh ǵylymynyń doktory Talas Omarbekov. Ǵalymnyń aıtýynsha, buǵan dástúrli tárbıemiz ben ólgenge topyraq shashpa degen túsinik óz yqpalyn tıgizýde. Al kózi tiri áriptes tarıhshylardyń kitaptary týraly retsenzııany basatyn kásibı jýrnal joq. Kúndelikti shyǵatyn gazet materıaldary qoǵamdyq pikir týdyra almaýda. Keńestik dáýirde syn-pikirdiń arqasynda ǵana ǵylym qaryshtap damydy. Búgingi tańda qazaq tarıhynan oqýlyq jazbaǵan tarıhshy qalmady. Alaıda onyń qaısysy jaqsy ekenin eshkim aıta almaıdy. Sebebi bul oqýlyqtardyń birde-bireýi syn tezinen ótpegen.
