Bizde sý joq emes, ony tıimdi retteıtin júıe joq - sarapshy

Qolda bar resýrstardy esepke alǵanda, árbir qazaqstandyq jylyna 5 myń tekshe metr sý tutyna alady jáne bul sý tabıǵı jolmen jańartylyp otyrady. Soǵan qaramastan, memleket azamattarǵa sý tapshylyǵynyń kúızelisin sezinbeıtindeı jaǵdaı jasaı almaı otyr. Sátbaev ýnıversıteti rektorynyń sý qaýipsizdigi jónindegi keńesshisi Kámshat Túsipova osyndaı pikir bildirdi, dep habarlaıdy QazAqparat tilshisi.

«Tapshylyq degen – ekonomıkalyq termın. Qazaqstannyń gıdrologtary sý tapshylyǵyn qalaı eseptep júr? Shamamen 4 ólshemshart bar. Onyń negizgileriniń biri – sý aǵynynyń kólemi. Qazaqstandaǵy sý aǵynynyń ortasha kólemi 102 tekshe shaqyrym. Ony eldegi halyqtyń sanyna bólsek, jylyna bir adamǵa 5 myń tekshe metr sýdan keledi.. Sý kúızelisiniń ındeksi boıynsha, bir adamǵa jylyna 1700 tekshe metr sýdan kelse, bul kúızelistiń birinshi deńgei bolyp esepteledi. Bizde bir adamǵa 5 myń tekshe metr sý dep otyrmyz. ıAǵnı, Qazaqstanda sý tapshylyǵy joq», - dedi sý mamany Astanada ótken «Qazaqstandaǵy sý daǵdarysy: sý resýrstaryn tıimdi basqarýdyń joldary qandaı?» atty talqylaýda.

Onyń sózinshe, bizdegi sý el aýmaǵynda árkelki taralǵan.

«Odan keıin bizdegi sý tapshylyǵy mezgilderge baılanysty. Bir melzgilde sý mol bolsa, bir mezgilde az bolady. Biraq bul bizde sý joq degen sóz emes. Mysaly, Birikken Arab Ámirlikterinde bir adamǵa jylyna 500 tekshe metrden 1000 tekshe metrge deıin sý tıedi. Bizdegi gıdrologııalyq derekterge qaraǵanda, Qazaqstanda sýdyń fızıkalyq tapshylyǵy joq. Bizde sýdyń ekonomıkalyq tapshylyǵy bar», - dedi sarapshy.