Bizde selqostyq bar – Ashat Maemırov Erjan Maksımge jetpeı qalǵan daýys jaıly
NUR-SULTAN. QazAqparat – Qalıbek Qýanyshbaev atyndaǵy Memlekettik akademııalyq qazaq mýzykalyq drama teatryna dırektory Ashat Maemırov «Junior Eurovision-2019» baıqaýynda Erjan Maksımge jetpeı qalǵan kórermenderdiń daýysyna qatysty pikirin bildirdi, dep habarlaıdy QazAqparat tilshisi.
«Bizde bireý qulap qalsa, súrinip ketse sony talqylaıdy. Al jetistikterdi jazbaımyz. Nege olaı ekenin bilmeımiz? «Junior Eurovision-2019» án baıqaýyna qatysyp jatqanyn bárimiz bilip otyrdyq. Selqostyq bizde bar. Biraq, sol otyrǵan adamdar bireýdiń súringenin kórse, jınalyp alyp, talqylaıdy. Jeńiske qýana almaımyz. Buny joqqa shyǵara almaımyz», - dedi Ashat Maemırov tilshilerdiń suraǵyna jaýap bere otyryp.
Al jas ánshi shyrqaǵan ánniń kompozıtory Hamıt Janǵalıev bolsa, Erjan Maksımniń ónerine tóreshilerdiń bári joǵary upaı bergenin aıtady.
«Biraq, bizdiń kemshiligimiz – daýys bermegenimizde. Bul bizdiń Internettegi arzan ázilderge qumarmyz. Al elde ne bolyp jatqanyna mán bermeımiz», - deıdi ol.
Aıta ketsek, Mádenıet jáne sport mınıstri Aqtoty Raıymqulova Polshada ótken «Junior Eurovision-2019» án baıqaýynda ekinshi oryn alǵan Erjan Maksımmen kezdesip, jas ónerpazdy jeńisimen quttyqtaǵan bolatyn.
Eske sala ketsek, Polshada ótken «Junior Eurovision-2019» án baıqaýynda baq synaǵan qazaqstandyq Erjan Maksım ekinshi oryn aldy. Qazylardyń bergen baǵasy boıynsha Erjan Maksım birinshi orynda edi. Al onlaın daýys berý qorytyndysymen 79 upaı jınady. Osylaısha qazaqstandyq ánshi jalpy 227 upaımen ekinshi oryn aldy.
QR Prezıdenti Qasym-Jomart Toqaev Erjan Maksımdi án baıqaýyndaǵy júldesimen quttyqtaǵan edi.
Óz kezeginde Erjan Maksım qazaqstandyqtarǵa alǵysyn aıtty.
«Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn», - dep jazdy ánshi.
