Bizde qordalanyp qalǵan másele týraly aýyz ashpaý ádeti bar - Toqaev

ASTANA. QazAqparat –Úkimettiń keńeıtilgen otyrysynda QR Prezıdenti Qasym-Jomart Toqaev Ekibastuz qalasynyń jylýsyz qalýyna ne sebep bolǵany tergeý arqyly anyqtalyp, tıisti sharalar qabyldanatynyn aıtty, dep habarlaıdy QazAqparat tilshisi.

«Bizde qordalanǵan problemalar týraly aýyz ashpaý tájirıbesi bar. Osy tájirıbe aýqymdy zardaptarǵa alyp keldi. Onyń saldaryn joıý úshin qomaqty qarajat kerek boldy. Ol týraly jańa ǵana Premer-Mınıstrdiń birinshi orynbasary da aıtty», - dedi Memleket basshysy.

Sondaı-aq Qasym-Jomart Toqaev atalǵan oqıǵadan sabaq alý mańyzdy ekenin eske saldy.

«Men bolǵan isten sabaq alyp, nege mundaı oqıǵa bolǵanyn, sebebin tergeý júrgizý kerek dep oılaımyn. Sonyń qorytyndysy boıynsha tıisti sheshim qabyldaımyz», - dedi Prezıdent.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıyn barysynda elimizdiń bıylǵy áleýmettik-ekonomıkalyq damýynyń negizgi kórsetkishteri týraly esep beriledi jáne Úkimettiń 2023 jylǵa arnalǵan jumys jospary qarastyrylady dep josparlanyp otyr.

Foto: t.me/bort_01