Bizde ǵylymı turǵyda alǵa jyljý joq - BǴM vıtse-mınıstri

ASTANA. QazAqparat - QR BǴM vıtse-mınıstri Aslanbek Amrın Astanada «Ǵylym men bıznesti biriktirý quraly retinde tehnologııalardy kommertsııalandyrý» forýmynda qazaqstandyq ǵalymdardyń jumysyndaǵy kemshilikterdi atap ótti, dep habarlaıdy «QazAqparat» HAA tilshisi.

«Álem bıotehnologııa, ınternet-taratý, tsıfrlandyrý, jasandy ıntellekt, neırojeli turǵysynda áldeqaıda alǵa basyp ketti. Al Qazaqstandy aldaǵy ýaqytta ne kútip tur? Ǵylymdaǵy búgingi basty trend - jasandy ıntellektti barlyq salaǵa, sonyń ishinde ǵylymǵa da engizý bolyp otyr. Máselen, biz áleýmettik jeli men mobıldi qosymshany qoldana otyryp, kóptegen múmkindikterge ıe boldyq. Munyń barlyǵyn búgin neırojeliler júzege asyrady», - deıdi ol.

Vıtse-mınıstrdiń aıtýynsha, aldaǵy ýaqytta zerthanashylar jumys istep júrgen jerde neırojeliler jumys atqaratyn bolady. Erte me, kesh pe bul úrdistiń keletinin aıtqan ol keleshekte keıbir personal tek aqparattyń kózi bolyp qana qalýy múmkin ekenin aıtady.

«Eń bastysy jańa óndiristik tóńkeris kezindegideı jumys oryndarynyń joǵalýyna daıyn bolýymyz kerek. 4.0 ındýstrııasy dál osyǵan ákeledi. Oǵan daıyn bolýymyz kerek. Sizderdiń laborantaryńyz kúndelikti jasap júrgen zertteýler óte arzan bolyp qalýy yqtımal. Mashına básekege qabiletsiz ǵalymdardy ysyrýy múmkin. Sondyqtan, bul ózgeriske ǵalymdar daıyn bolýy tıis», - deıdi ol.

Aslanbek Amrın qazaqstandyq ǵalymdardyń tek jasandy ıntellekt turǵysynan emes, ózge de salada artta qalǵanyn aıtady.

«Qazirgi qoldanbaly ǵylymdaǵy ahýalǵa, ıaǵnı sheteldik jáne qazaqstandyq patentterge kóz júgirteıik. 2016 jyly bizdiń otandyq patenttiń satylýynan bar-joǵy 1 mıllıon AQSh dollary ǵana túsken. Biz sizderge myqtylarmen teńesýdi usynamyz», - deıdi vıtse-mınıstr.

Onyń aıtýynsha, Qazaqstan dınamıkalyq turǵyda damyp kele jatqanymen, ınnovatsııa, ǵylymı maqalalar, bıznespen jumys turǵysynan kórsetkish álemdik trendterge qaraǵanda joǵary deńgeıde emes.

«BAQ tarapynan biletinderińizdeı, bizdiń ǵalymdardy feıktik jýrnaldarǵa maqala jarııalaý turǵysynan tipti alaıaqtar aldap ketedi. Bul ǵalymdar men ǵylymnyń deńgeıin kórsetedi. Qurmetti ǵalymdar! Biz bárimiz de kóptegen salada bir orynda turyp qaldyq. Ǵylymı alǵa jylý degenniń ne ekenin umytyp kettik. Bizde ǵylymı alǵa jyljý joq. Álemdik bazalarǵa bir ret kóz júgirtýdiń ózi jetedi. Ózgeris kerek. Barlyq trendter men basymdyqtar Elbasynyń «Rýhanı jańǵyrý» baǵdarlamasynda aıtylǵan. Saıası jiger bar. Jospardy sizdermen birge atqaryp, alǵa basý kerek», - deıdi vıtse-mınıstr.

Aslanbek Amrın ǵylymı turǵyda nátıje joq bolǵannan keıin halyqtyń bul salaǵa senimi azaıyp, memleket tarapynan bıýdjetten bólinetin aqsha azaıǵanyn jetkizdi.

foto: edu.gov.kz