Bizde esirtki pıtstsadan tez jetkiziledi - prokýror

ASTANA. QazAqparat – «Qazir 12 jasar oqýshy sıntetıkalyq zatty telegram kanal arqyly satyp alyp, ony pıtstsa jetkizýden góri tezirek ala alady». Bul týraly Bas prokýratýra departamentiniń bastyǵy Áljan Nurbekov nashaqorlyqtyń aldyn alý jáne esirtki qylmysyna qarsy is-qımyl máseleleri boıynsha vedomstvoaralyq keńeste aıtty, dep habarlaıdy QazAqparat vedomstvonyń baspasóz qyzmetine silteme jasap.

Resmı statıstıkaǵa sáıkes elimizde barlyǵy 18,3 myń esirtkige táýeldi adam bar. 2022 jyly esirtkini mólsherden tys qoldanǵany úshin 87 adam qaıtys boldy. Bul sandar naqty jaǵdaıdy kórsetpeıdi. DDU usynymdaryna saı Qazaqstanda nashaqorlar sany 150 myń adamǵa jetýi múmkin. Jastar jarqyraıtyn shaǵynda baýyr tsırrozynan, jedel júrek ustamasynan qaıtys bolyp jatyr, sýıtsıd jasaıdy, alaıda árdaıym esirtkini qoldanýmen sebep-saldarlyq baılanys ornatylmaıdy. Taǵy bir másele – sıntetıkanyń ońaı qol jetimdiligi. Qazir kez kelgen 12 jastaǵy oqýshy zatty telegram kanal arqyly satyp alyp, ony pıtstsa jetkizýden góri tezirek ala alady. Negizinen shetelden basqarylatyn esirtki trafıginiń qoldanystaǵy modeli úshin «salymshy» retinde bizdiń «jetilmegen» jastarymyz tartylýda, olar úshin paıda tabýdyń quraly retinde qyzmet etedi

, - dedi Bas prokýratýranyń Strategııalyq damý departamenti bastyǵy Áljan Nurbekov.

Vedomstvoaralyq keńeske quqyq qorǵaý jáne arnaıy memlekettik organdardyń, beıindi mınıstrlikter men ÚEU ókilderi qatysty. Maqsat – eldegi esirtki ahýalynyń odan ári nasharlaýyna jol bermeý boıynsha sharalar keshenin ázirleý, sondaı-aq 30 mamyrdaǵy Úılestirý keńesiniń qorytyndysy boıynsha Bas prokýrordyń tapsyrmasyn iske asyrý.

Keńes barysynda atalyp ótkendeı, nashaqorlyqtyń aldyn alýdyń qoldanystaǵy júıesi tásilderdi qaıta qaraýdy, sondaı-aq qabyldanyp jatqan sharalardyń áserin joqqa shyǵaratyn birqatar faktorlardy joıýdy talap etedi.

Esirtkige táýeldi adamdar statıstıkasynyń, olardyń ólim sebepteriniń bolmaýy, psıhotroptyq zattardyń ońaı qol jetimdiligi, ońaltýdyń kúrdeliligi, osy jáne basqa da birqatar máselelerdi sheshý joldary belsendi talqylaýdyń taqyryby boldy. Vedomstvoaralyq ózara is-qımyldy kúsheıtý, memlekettik shekarada prekýrsorlardy ákelýge tosqaýyl qoıýdy qamtamasyz etý, bıznesti damytý úshin esirtki satýshylar paıdalanatyn onlaın-platformalardyń qyzmetin retteý, esirtkige táýeldi adamdar úshin jeke ońaltý ortalyqtary qyzmetiniń biryńǵaı standartyn ázirleý, táýeldiliktermen jumys isteýge mamandanǵan kadrlardy daıarlaý jáne oqytý, jastarmen jáne olardyń ata-analarymen aldyn alý sharalaryn jandandyrý qajettiligi jáne basqa da kóptegen máseleler kóterildi.

Ázirlengen sharalardy iske asyrýmen vedomstvoaralyq jumys toby aınalysatyn bolady, onyń quramyna múddeli vedomstvolar men úkimettik emes uıymdardyń ókilderi kirdi.