Bizde aıyppuldan túsetin aqshany naqty problemaǵa baǵyttaý degen túsinik joq – sarapshy

NUR-SULTAN. QazAqparat – «Sandj» zertteý ortalyǵynyń jetekshisi Janar Jandosova QR Qarjy mınıstrliginde ótken brıfıngide bıýdjetke túsetin aıyppul tólemderin naqty problemalardy sheshýge baǵyttaýdy usyndy, dep habarlaıdy QazAqparat tilshisi.

«Bıýdjet jobasy berilgen kezde burnaǵy jyldardyń aqparaty birge usynylmaıdy. Al bizge tarıhı derekter árdaıym qyzyq. Buǵan deıin belgili bir salaǵa qansha aqsha bólingenin, bolashaqta qansha bólinetinin salystyryp qaraýǵa bolady. Sondyqtan memleket bólip otyrǵan qarajattyń kóp nemese az ekenin túsinýi qıyn. Bizde áleýmettik saıasat pen naqty qarjylaı emes kórsetkishterdiń baılanysy jarııalanbaıdy. Jalpy bıýdjet jobasnyda qarjy jumsaýdyń nátıjesinde qol jetkizý josparlanǵan naqty nátıjelerdiń kórsetkishi berilmeıdi. Mysaly, kólik salasyna, ınfraqurylymǵa qansha aqsha bólinip jatqanyn jarııalaımyz. Biraq ol aqshaǵa neshe shaqyrym jol salynǵanyn, neshe ǵımarat qoldanysqa berilgenin esepte kórsetpeımiz», - dedi Janar Jandosova

Sondaı-aq ol bıýdjet jobasynda qur aqshasynyń somasy ǵana emes, sala-sala boıynsha qarjydan tys nysandaǵy nátıjeler kórinis tabý kerek degen usynys aıtty.

«Taǵy mynandaı dúnıe bar. Biz qorshaǵan ortaǵa qandaı da bir shyǵarynda tastaıtyn kompanııalardan ekologııalyq aıyppuldar óndiremiz. Bul ekoaıyppuldar ortaq qazanǵa túsedi de, túrli sharalarǵa baǵyttalyp ketedi. Negizi bul qarajat zkologııalyq problemalardy baǵyttalýy kerek», - dedi sarapshy.

Onyń paıymynsha, ár túrli salada óndiriletin aıyppuldan túsken qarjynyń qaıda jumsalatyny áýel basta bárine túsinikti bolýy qajet.

«Mysaly jyldamdyqty arttyrǵany úshin tólenetin aıyppuldy kóshelerdiń ınfraqurylymyn jaqsartý úshin baǵyttaı alamyz. Ókinishke qaraı, bizde ondaı túsinik joq. Osy boıynsha jumys isteýimiz kerek», - dedi Janar Jandosova.

QR Aýyl sharýashylyǵy mınıstrliginiń deregi boıynsha, byltyr jer zańnamasyn buzǵandarǵa 219 mln teńge aıyppul salynǵan.