Bizde alaýyzdyq týyndaıdy degen sáýegeılik aıtýshylar boldy - biz tynyshtyq pen kelisimdi saqtap qaldyq! - Salman Geroev
«Keńes Odaǵy qulaǵannan keıin bizde alaýyzdyq týyndaıdy, degen sáýegeılik aıtýshylar boldy, alaıda Memleket basshysynyń kóregendigi men salıqaly saıasatynyń arqasynda biz tynyshtyq pen kelisimdi saqtap qaldyq, táýelsizdigimizdi aldyq, teńdik pen ádilettilik ornady. Biz muny óte joǵary baǵalaımyz», - dedi ol.
Qazaqstan halqynyń birligi kúniniń mańyzy týraly aıta kelip, S.Geroev «bizdiń birtutas halyq ártúrli ulystardan: jergilikti qazaq halqymen qatar, Uly Otan soǵysy jyldarynda kúshtep qonys aýdarylǵan, tyń jerlerdi ıgerýge kelgen jáne basqa da sebeptermen osy jerge qonys tepken halyqtardan quraldy», dep atap kórsetti.
«Nursultan Ábishulynyń «Barlyq qazaqstandyqtar teń» degen sózi meniń esimde. Ol ata-baba dástúrlerin saqtaı otyryp, memlekettilikti nyǵaıtý, ony órkenıetti jáne demokratııalyq álemdik qoǵamdastyq talaptaryna sáıkestendirý mindetin alǵa qoıdy. Búginde biz onyń nátıjesin kórip otyrmyz - qazaq jerinde júzden astam ulttyń ókilderi tatý-tátti turyp jatyr, bizde naǵyz ultaralyq kelisim ornady. Biz basqa elderde bolyp jatqan, ártúrli soǵystar men janjaldarǵa, basqa da keleńsiz qubylystarǵa eshqashan da jol bermeımiz», - dedi ol.
S.Geroev barsha qazaqstandyqtarǵa gúldený, ıgilik pen dostyq tilegen lebizin bildirdi. Onyń aıtýynsha, Qazaqstanda 40 myńǵa tarta sheshen men 20 myń ıngýsh ómir súrýde. Astanada 5 myńǵa jýyq atalǵan ulystardyń ókilderi turady. «Biz basqa halyqtarmen dostyq ráýishte qoıan-qoltyq ómir súrip otyrmyz. Bul bizdiń ata-babalarymyzdyń dástúrleri men amanaty», - dep túıdi S.Geroev.
