Bizde akademıkter tym kóp, keıbiriniń taza ǵylymǵa esh qatysy joq – Qasym-Jomart Toqaev

ASTANA. QazAqparat – Ulttyq ǵylym akademııasynyń jumysy túbegeıli ózgerýge tıis. Bul pikirdi Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń birinshi otyrysynda aıtty, dep habarlaıdy QazAqparat

«Ǵylymdy damytýdyń jańa úlgisine sáıkes Ulttyq ǵylym akademııasynyń róli erekshe bolady. Ǵylym akademııasyna jaqynda Prezıdent janyndaǵy organ mártebesi berildi. Ony qarjylandyrý máselesi sheshildi. Akademıkterge ómir boıy stıpendııa tólenetin boldy.

Biraq osy jerde ashyq aıtýym kerek: bizde akademıkter tym kóp, keıbir akademıkterdiń taza ǵylymǵa esh qatysy joq. Bir qaraǵanda, akademık degen aty bar. Biraq ǵylymdy damytýǵa qosqan úlesin eshkim bilmeıdi. Osyndaı akademıkterdiń ǵylymı sapasy da, olardyń ǵylymǵa qosqan úlesi de kúmándi. Bul Akademııaǵa nuqsan keltirgeni sózsiz. Sondyqtan Akademııanyń jańa basshylyǵy osy mańyzdy máselege nazar aýdarýy kerek. Ǵylym akademııasynyń bedeli, abyroıy minsiz bolýy qajet.

Naǵyz ǵalym bolý – akademık ne bolmasa doktor ataǵyna ıe bolý emes, jan-dúnıeńmen berilip ǵylymmen aınalysý, zertteý júrgizý arqyly qoǵamǵa, elge paıdańdy tıgizý ekenin nazarda ustaý qajet. Akademııanyń jumysy túbegeıli ózgerýge tıis», - dedi Qazaqstan Prezıdenti.