#BizBirgemiz: Túrkistandyq depýtat koronavırýs indetine qarsy 100 mln teńge bóldi

TÚRKІSTAN. QazAqparat - Elimizdegi tótenshe jaǵdaıǵa baılanysty óńir-óńirlerdegi kásipkerler Elbasymyzdyń úndeýine ún qosyp, koronovırýs indetine qarsy kúreske qarjylaı qoldaý bildirip jatyr.

Sondaı ıgi istiń birin ońtústik óńirine keńinen tanymal kásipker, Túrkistan oblystyq máslıhatynyń depýtaty, «Nur Otan» partııasy fraktsııasynyń múshesi Serikjan Seıitjanov jalǵastyryp, 100 mln teńge qarjy aýdardy.

Belgili metsenat buǵan deıin de qaıyrymdy isterdiń basy-qasynda júrgenin jurt jaqsy biledi. Qazir de osy isimen ol túrkistandyq bıznesmenderge úlgi kórsetip otyr.

«Koronavırýs tek bizdiń eldi ǵana alańdatyp otyrǵan joq. 120-ǵa jýyq memleketke tarap, úreı týǵyzdy. Osy rette Elbasynyń keshegi úndeýine ún qosyp, osy indetke qarsy kúres jumystaryna 100 mln teńge bólýdi azamattyq paryzym dep sanadym. Bul qıyn kezeńder de artta qalyp, indet aýyzdyqtalady dep senemin. Osyndaı qıyn-qystaý sátte eldigimizdi kórsetip, yntymaq, birliktiń arqasynda indetti jeńip shyǵýǵa shaqyramyn»,-dedi Serikjan Seıitjanov.