#Bizbirgemiz: «Astana» fýtbol klýby zeınetkerlerdiń aýlasyn qardan tazartty
NUR-SULTAN. QazAqparat – «Astana» fýtbol klýby «Biz birgemiz» chellendjine atsalysty, dep habarlaıdy QazAqparat klýbtyń saıtyna silteme jasap.
«Astana» fýtbol klýby Prezıdenttik kásibı sport klýbymen birlese otyryp, Eriktiler jylyna arnalǵan chellendjge qoldaý kórsetti.
Birinshi Lıgada óner kórsetetin «Astana jas» komandasynyń fýtbolshylary klýb basshylyǵymen birge burynǵy Telman kentiniń aýmaǵynda turatyn zeınetkerlerdiń aýlasyn qardan tazalap qaıtty.
«Elordada sońǵy kúnderi qar tolassyz jaýǵandyqtan astanalyq eriktiler «Biz birgemiz» chelendjin bastap, táýlik boıy tynymsyz eńbek etetin kommýnaldyq qyzmet ókilderine qoldaý kórsetýdi jón kórdi. Qala turǵyndary bastamany óz qoldaryna alyp, aýlalardyń bir bóligin qardan tazalap, ony beınetaspaǵa túsirip, #Bizbirgemiz heshtegi arqyly jelige salýdy usynady», delingen habarlamada.
«Astana» fýtbol klýby «Biz birgemiz» chellendjin tanymal ázilkesh, ári klýb jankúıeri Tursynbek Qabatovtan qabyl alyp, bul bastamany ári qaraı Qazaqstan Fýtbol federatsııasyna, Qazaqstannyń Kásibı fýtbol lıgasyna, sondaı–aq «Old boız» jáne «12 oıynshy» jankúıerleriniń birlestikterine joldaıdy.
Aıta keteıik, elorda eriktileriniń bastamasyn Memleket basshysy Qasym-Jomart Toqaev qoldaǵan edi.
