Biz júrgizýshilerge quqyq beretin máselelerge áli kúnge deıin atústi qarap júrmiz - senator
ASTANA. Aqpannyń 3-i. QazAqparat /Aıdar Ospanalıev/ - Biz júrgizýshilerge quqyq beretin máselelerge áli kúnge deıin atústi qarap júrmiz.
Biz ereje buzǵandardyń barlyǵyn túgel jazalaı almaımyz. Bul máseleniń eń oıtaıly jaýaby turǵyndardy jolda júrý tártibine úıretý. Osy máselege búgin memlekettik organdar tarapynan jetkilikti deńgeıde kóńil bólinbeı otyr. Bul týraly búgin Qazaqstan Respýblıkasy Prezıdenti janyndaǵy Adam quqyqtary jónindegi komıssııanyń otyrysynda senator Qýanysh Sultanov aıtty, dep habarlaıdy QazAqparat.
Onyń pikirinshe, jol qaýipsizdigin qamtamasyz etý sharalarymen tereńirek ári júıeli túrde aınalysqan jón. «Al biz ázirge jol-kólik oqıǵalarymen baılanysty faktilerdi tizbelep qana otyrǵan sııaqtymyz. Elimizdegi jol qaýipsizdigin mynadaı kórsetkishterden-aq kórýge bolady. Jańa jyl merekesin biz 5 kún qatarynan atap óttik. Osy 5 kúnde respýblıkada 356 jol-kólik oqıǵasy oryn alyp, onyń saldarynan 78 adam mert bolǵan. Al Beıjińde 15 mıllıonǵa jýyq adam turady. 5 kún ishinde onda nebári 75 jol-kólik oqıǵalary oryn alyp, birde-bir azamat osy oqıǵalardyń qurbany bolǵan joq. Osy turǵydan alǵanda, bizge qazir birinshi kezekte kólik júrgizý mádenıetin kóterýge kúsh salý qajet», dedi depýtat.
Sondaı-aq ol elimizde jaıaý júrginshilerdiń quqyqtary óte kóp buzylatyndyǵyn jetkizdi. Sonymen qatar jolda júrý erejesine baılanysty shet memleketterdegi jaǵdaıdy mysalǵa keltirgen ol Qazaqstandaǵy jol tártibin buzý áreketteriniń kóptigi júrgizýshilerdiń saýatsyzdyǵynan ekendigin atap kórsetti. «Sondyqtan jol qaýipsizdigi óte mańyzdy másele», dedi Q.Sultanov.
