Biz jer máselesi boıynsha taǵy bir naqty sıgnal aldyq - Darhan Káletaev
ASTANA. QazAqparat - QR Parlamenti Senatynyń depýtaty Darhan Káletaevtyń oıynsha, búginde Konstıtýtsııanyń 26-babyn ózgerissiz qaldyrýǵa qatysty sheshimniń saıası astaryn izdeýdiń qajeti joq, dep habarlaıdy QazAqparat tilshisi.
«Iá, Konstıtýtsııanyń 26-babyna qatysty sanalýan pikirler bar. Ony árkim árqalaı topshylaıdy. Degenmen, bul saıası-tehnologııalyq qadam boldy ma, joq pa, eń bastysy ol ózgeris ótpeı qaldy. Sosyn ol - Memleket basshysynyń sheshimi ǵan emes, jalpy halyqtyń qalaýy. Endi, ekonomıkalyq turǵyda qaraǵanda, árıne, bul talqylaý halyq úshin, sonyń ishinde qazaq halqy úshin jer máselesiniń ekonomıkalyq emes, kıeli sıpatqa ıe ekenin kórsetti. Osy máselege qatysty biz taǵy bir márte naqty sıgnal aldyq », - dedi Káletaev búgin Astanada ótken baspasóz máslıhatynda.
Senator Prezıdent ókilettilikterin Úkimetpen Parlament bólýdi úlken saıası reformalardyń bastamasy dep sanaıdy. «Qazirgi kezde álemdegi jaǵdaı tynysh emes ekenin bárimiz jaqsy bilemiz. Kórshi elder, kerisinshe, prezıdenttik bılikti kúsheıtip jatyr. Al Qazaqstan Prezıdenti óz ókilettilikterin taratyp berip otyr. Bul - batyl ári qurmetke ıe qadam. Menińshe, osynyń bári - úlken saıası reformalardyń basy», - dep atap kórsetti senator.
Aıta keteıik, búgingi brıfıng kezinde Darhan Káletaev terrorıstik qylmystarmen qatar eldiń asa mańyzdy múddelerine zııan keltirgeni úshin azamattyqtan aıyrý jazasyna qatysty konstıtýtsııalyq ózgeristerge túsinikteme berdi .
