«Biz – Jeńistiń muragerlerimiz!» estafetasy Oralda jalǵasty
Atalmysh shara 1941 jyly 8-gvardııalyq motoatqyshtar dıvızııasy qurylǵan Almaty qalasynda bıylǵy 5 aqpanda bastaý alǵan edi.
Respýlıkalyq shara QR Іshki ister mınıstri, polıtsııa general-leıtenanty Erlan Turǵymbaevtyń tapsyrmasyna sáıkes QR Ulttyq ulanynyń qolbasshysy, general-leıtenant Rýslan Jaqsylyqovtyń qoldaýymen ótkizilýde.
Sovet Odaǵynyń Batyry, general-maıor Ivan Panfılovtyń atyn ıelengen 8-gvardııalyq motoatqyshtar dıvızııasy jaýyngerlik týynyń kóshirmesi Jańaózennen jetkizilip, Jeńis alańynda Ulttyq ulannyń Oral polkyna tabys etildi.
Týdy qabyldap alǵan 5517-áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Jánibek Sársenov ony 9 naýryzda Aqtóbe qalasyndaǵy Ulttyq ulan jaýyngerlerine (6655-áskerı bólim) tabys etetin bolady.
«Bıyl Jeńistiń 75 jyldyǵy keńinen atalyp ótiledi. Biz fashızmdi jeńgen aǵa býynnyń urpaǵymyz. Biz olardyń erlikterin árdaıym este saqtaımyz. Budan bylaı da ata-babamyzdan jalǵasyp kele jatqan ıgi salt-dástúrlerimizdi jalǵastyra otyryp, elimizdiń nyq basyp, órkendeýine óz úlesimizdi qosa beretin bolamyz», dedi saltanatty jıynǵa qatysqan oblys ákimi Ǵalı Esqalıev.
Sondaı-aq Ulttyq ulan «Batys» óńirlik qolbasshysynyń tárbıe jáne áleýmettik-quqyqtyq jumystar jónindegi orynbasary, podpolkovnık Baqyt Alazov, soǵys ardageri Venıamın Skalenko patrıotızmdi nyǵaıtýda mundaı sharalardyń mańyzy zor ekendigin atap kórsetti.
Budan keıin 500-den astam adam qatysqan áskerı sherý boldy.
Respýblıkalyq estafetaǵa qatysýshylar eki kún boıy Oraldaǵy maıdangerlerdiń úılerine baryp, taǵzym etedi. Jastar arasynda taqyryptyq keshter men erlik sabaqtaryna qatysyp, qazaqstandyqtardyń Jeńiske qosqan úlesi jóninde fılmder kórsetiledi.
Aıta keteıik, estafeta buǵan deıin Almaty, Qaskeleń, Uzynaǵash, Qarakemir, Taldyqorǵan, Taraz, Shymkent, Túrkistan, Qyzylorda, Atyraý, Aqtaý, Jańaózende bolǵan edi. Endi elimizdiń iri jeti qalasynda ótkennen keıin shara 7 mamyrda Nur-Sultanda qorytyndylanady.
