Biz jeńisimizdi el táýelsizdiginiń 20 jyldyǵy men Elbasy N.Á.Nazarbaevtiń qurmetine arnaımyz - «Chogorı» shyńyn baǵyndyrǵan alpınıster
ALMATY. 13 qyrkúıek. QazAqparat /Názıra Eleýhan/ - Biz jeńisimizdi el táýelsizdiginiń 20 jyldyǵy men Elbasy N.Á.Nazarbaevtiń qurmetine arnaımyz. Bul týraly búgin Almatyda ótken arnaıy baspasóz máslıhatynda «Chogorı» shyńyn baǵyndyrǵan alpınıster Maqsut Jumaev pen Vasılıı Pıvtsov aıtty.
Esterińizge sala ketsek, olar 23 tamyz kúni, 18.30-da Pákistan men Qytaı elderi aralyǵynda jatqan «Chogorı» taýynyń eń bıik núktesine «kıslorodty» qoldanbaı shyǵyp, elimizdiń kók baıraǵyn ornatyp, elge aman esen oralǵan bolatyn. 6 adamnan quralǵan ekspedıtsııa quramynda Qazaqstanmen qatar, Avstrııa, Polsha, Germanııa jáne Argentına elderiniń alpınısteri boldy. Olardyń ishinen tek qazaqstandyq, avstrııalyq jáne polıak alpınısteri shyńdy baǵyndyrǵan. Ekspedıtsııa 16 shilde kúni bastalǵan bolatyn.
Atalmysh taýǵa shyǵý álem boıynsha eń qıyn taýlardyń biri bolyp tabylady. Taýdyń eń bıik núktesi Everest taýynan 200 metrge alasa. Osy shyńdy baǵyndyrýǵa qanshama alpınıster shyqqan. Biraq onyń kópshiligi ne shyǵa almaǵan, ne sol taýda qaza bolǵan. Sondyqtan da «Chogorı» taýy búginde «Óltirgish taý» degen atpen belgili. Qazaqstandyq alpınısterdiń aıtýynsha, bul taýǵa tek kásibı alpınıster ǵana shyǵa alady, ne eshkim shyqpaıdy.
«Alpınıster úshin eń qıyny - aýyr da, qıyn marshrýtty tańdap alý boldy. 20 adamnyń kúshimen shyǵatyn taýdy, 6 adam baǵyndyrdy. Bul úlken erlik», dep atap ótti baspasóz máslıhatynda AOSK-niń bas jattyqtyrýshysy Ervand Ilıskıı.
«Biz Qytaı eliniń soltústik jaǵynan shyqtyq. Taýǵa órmeleý kezinde qıynshylyqtar boldy. Aýa raıy da qolaısyzdyq tanytty, tamaq pen aýyz sý tapshylyǵyn da kórdik. Bul taýda negizinen aýa-raıy qysy-jazy jaman bolyp turady, joly da qıyn. Osyǵan qarap, bul taýdy baǵyndyrýdyń qanshalyqty qıyn ekenin bilýge bolady. Shyńnyń basynda -40 gradýs sýyq boldy. Aıaq-qolymyz úsýge shaq qaldy. Joldyń ortasynda qalyń qar jaýdy. Eń qorqynyshtysy 18 tamyz kúni qar kóshkini astynda qalǵanymyz boldy. Odan aman shyqqanymyz shynymen de tań qalarlyq oqıǵa boldy. Biz maqsatymyzǵa jetý úshin barlyq kúsh -jigerimizdi saldyq»,-dedi alpınıst Maqsut Jumaev.
«Saýatty túrde aǵzany beıimdeýdiń arqasynda biz «kıslorodty» qoldanbaı shyǵa aldyq. Jetistikpen oryndap qaıtqanymyzǵa qýanyshtymyz. Ár sportshynyń eń úlken armany - olımpıada chempıony bolý bolsa, bizder úshin «K2» shyńyn baǵyndyrý armandarymyzdyń eń bıigi»,-dedi ekinshi qazaqstandyq alpınıst Vasılıı Pıvtsov.
Olardyń aıtýynsha, ekspedıtsııaǵa daıyndyqqa eki jarym aı ketken. Aldaǵy ýaqytta halyqaralyq dárejedegi alpınıster Everest taýynyń eń bıik shyńyn baǵyndyrýdy josparlap otyr.
Shara barysynda Ulttyq Olımpıada komıtetiniń Bas hatshysy Tımýr Dosymbetov qazaqstandyq alpınısterdi uıym atynan jeńisterimen quttyqtady.
