Biz jańa ekonomıkany quryp, jańa býyndy tárbıeledik-Elbasy

NUR-SULTAN. QazAqparat - Elordada ótip jatqan «Astana ekonomıkalyq forýmynda» Elbasy Nursultan Nazarbaev eldiń damýyn jalǵastyrý úshin qajet qadamdardy atady, dep habarlaıdy QazAqparat tilshisi.

«Táýelsizdiktiń alǵashqy jyldary, ıaǵnı 1993 jyly bizdegi qarjy tapshylyǵy kezeńinde jastardy myńdap álemniń úzdik ýnıversıtetterine jibere bastadyq. Búginde 20 myń jas maman bilim alýdy jalǵastyrýda. Osy ýaqyt ishinde zamanaýı 3 ýnıversıtetti qurdyq. Sonymen qatar, qurylǵan zııatkerlik mektepterde úzdik balalar oqyp jatyr. Atap aıtqanda, biz jańa ekonomıka jasap jáne jańa elordany salyp, jańa býyndy tárbıelep shyǵardyq. Bul jumystardy jalǵastyrý kerek. Munymen qosa, elde tájirıbelik istermen de aınalysý mańyzdy. Bul turǵyda adamdardyń ómir sapasyn jaqsartýǵa ekpin qoıylady», - dedi Nursultan Nazarbaev.

Elbasy Qazaqstannyń basshylyǵy osyǵan deıin bastalǵan isti jalǵastyratynyn atap ótti.

«Strategııa-2050» elimizdiń 2030 jylǵa qaraı álemniń damyǵan top-30 quramyna enýin eskerip otyr. Ol úshin qajetti barlyq baǵdarlamalar jasaldy, bul rette bastamalardy júzege asyrý úshin qarjy bar. Bizde múmkindikter men kadrlar jetkilikti. Sondyqtan osy jumystarǵa bolashaqta Úkimet nazar aýdaratyn bolady», - dedi Elbasy.