Biz jahandyq qaterlerge ózimizdiń naqty múmkindikterimizge negizdelgen is-áreketter josparymyzdy qarsy qoıýǵa tıispiz - Elbasy
ASTANA. QazAqparat - Biz jahandyq qazirgi qaterlerge ózimizdiń jańa jaǵdaıǵa, naqty múmkindikterimizge negizdelgen is-áreketter josparymyzdy qarsy qoıýǵa tıispiz. Búgin Astanadaǵy Táýelsizdik Saraıynda Qazaqstan Prezıdenti Nursultan Nazarbaev «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda osylaı málimdedi.
«Ekonomıkalyq ósimniń báseńdeýi álemniń barlyq ekonomıkalarynda da kórinis taýyp otyr. Álemdik ekonomıkanyń naqty quldyraý kórsetkishteri eshkimdi de tańǵaldyrmaıtyn boldy. Aǵymdaǵy jyldyń kúzine deıin Halyqaralyq valıýta qory óziniń boljamyn alty ret qaıta túzetýge májbúr boldy: damý kórsetkishterin besten úshke deıin túsirdi. Bul da shek emes. Biz barshamyz birge talaı synaqty bastan keshirdik», - dedi N. Nazarbaev.
Budan bólek, Elbasy halyqaralyq ahýalǵa da toqtalyp ótti. Prezıdent álemniń turaqsyzdyq kúı keship otyrǵanyn, álemdik úlken derjavalar bir-birine sanktsııalar salyp, olardyń arasynda senimdilik kúrt tómendep ketkenin atap ótti.
«Taıaý jáne Orta Shyǵystaǵy, Soltústik jáne Ortalyq Afrıkadaǵy turaqsyzdyq bosqyndardyń óte úlken aǵymyn týdyrdy. Kún saıyn terrorıstik aktiler saldarynan jazyqsyz adamdar qurban bolyp jatqany týraly habarlar aıtylyp jatyr. Álemge halyqaralyq terrorızm aıtarlyqtaı salmaqty qaýip tóndirýde. Bul memlekettiliktiń buzylýynan, egemen elderdiń isterine syrtqy kúshterdiń kedergi keltirýinen bolyp otyr. Memlekettilik, bılik joq jerde ekstremıster men terrorıster, bandıtter ózderin erkin sezdiredi. Bunyń bári álemdik, óńirlik kúshter ortalyǵynyń qatań básekelestigi aıasynda oryn alýda. Biz osyndaı jahandyq qazirgi qaterlerge ózimizdiń jańa, naqty múmkindikterimizge negizdelgen is-áreketter josparymyzdy qarsy qoıýǵa tıispiz », - dedi N. Nazarbaev.
