Biz úshin túrkitildes eldermen baılanys ornatý asa mańyzdy - A.Esimov
ALMATY. QazAqparat - Almaty qalasynyń ákimi Ahmetjan Esimov túrkitildes memleketterdiń yntymaqtastyq keńesi janyndaǵy Aqsaqaldar keńesiniń múshelerin qabyldady. Bul týraly búgin Almaty qalasy ákiminiń baspasóz qyzmetinen habarlady.
Kezdesý barysynda bul kúnderi Almatyda ótip jatqan Túrki keńesiniń jetinshi kezdesýiniń máseleleri jan-jaqty sóz boldy.
Qala ákimi Keńestiń baýyrlas túrki halyqtary arasyndaǵy dostastyqtyń nyǵaıýyna zor úles qosyp kele jatqandyǵyn erekshe ataı kele: «Bıyl Almaty - TMD elderiniń mádenı astanasy dep jarııalandy. 2015 jyly bizdiń qalamyz bilim, ǵylym jáne mádenıet máseleleri boıynsha Islam uıymy (ISECKO) aıasynda Islam mádenıetiniń astanasy atanbaq. Sondyqtan, biz úshin túrki tildi eldermen baılanys óte mańyzdy. Bizdiń elimizde kóp vektorly baılanysty odan ári nyǵaıtý úshin barlyq jaǵdaılar jasalǵan. Keńestiń jetinshi kezdesýin ótkizý baýyrlas memleketter arasyndaǵy iskerlik seriktestikti odan ári nyǵaıtatyn bolady», - dedi. Óz kezeginde túrkitildes memleketter dostastyǵy keńesiniń bas hatshysy Halıl Akynjı bul uıymnyń Qazaqstan Prezıdenti Nursultan Nazarbaevtyń bastamasymen qurylǵandyǵyn atap ótti.
«Túrkitildes memleketter keńesiniń alǵashqy sammıti 2011 jyly Almatyda ótti. Sondyqtan, bul qalanyń biz úshin mańyzy zor. Búgin Almatyda Túrki keńesiniń kezdesýleri ótip jatyr, bul bizdiń elder arasyndaǵy dostyq baılanystyń odan ári nyǵaıýynyń basty kepili», - dedi Halıl Aqynjı.
