Biz uly oıshyl Abaıdy álemge laıyqty deńgeıde tanyta almaı kelemiz - Prezıdent

NUR-SULTAN. QazAqparat - Qazirgi órkenıetti memleketterdiń barlyǵy derlik shoqtyǵy bıik tarıhı tulǵalarymen maqtana alady. Olardyń qatarynda saıasatkerler, memleket jáne qoǵam qaıratkerleri, qolbasshylar, aqyn-jazýshylar, óner jáne mádenıet maıtalmandary bar. Qazaq jurty da birtýar perzentterden kende emes. Solardyń ishinde Abaıdyń orny erekshe. Biraq biz uly oıshylymyzdy jahan jurtyna laıyqty deńgeıde tanyta almaı kelemiz.

Memleket basshysy búgin jarııalaǵan «Abaı jáne HHІ ǵasyrdaǵy Qazaqstan» atty maqalasynda osylaı dep jazdy.

«Men kóp jylǵy dıplomatııalyq qyzmetimde basqa elderdiń saıasatkerlerimen, túrli sala mamandarymen jıi kezdestim. Sheteldiktermen adamzatqa ortaq kóptegen túıtkildi máseleler týraly pikir almasyp, oı bólistim. Jalpy, olar Qazaqstannyń saıası jáne ekonomıkalyq jetistikteri jóninde jaqsy biledi. Al, rýhanı jáne mádenı qundylyqtarymyzben jete tanys emes. Osy oraıda «Nege qazaqtyń bitim-bolmysyn, mádenıetin Abaı arqyly tanytpaımyz?», – degen suraq týyndaıdy.

Ǵulama Abaı – qazaq topyraǵynan shyqqan álemdik deńgeıdegi kemeńger. Ol kúlli adamzat balasyna aqyl-oıdyń jemisin syılady.

Abaıdyń aqyndyq qýatynyń tereń tamyryna úńilgen zertteýshilerimiz onyń qazaq folklorynan, Shyǵys pen Batystyń sóz ónerinen, orys ádebıetinen, tarıhı eńbekterden sarqylmas nár alǵanyn aıtady» delingen Prezıdent maqalasynda.

Sondaı-aq, Memleket basshysy aqynnyń dinı kózqarasy arqyly da bıikteı beretin tulǵa ekenine basa nazar aýdarǵan.

«Abaıdyń asqan oıshyldyǵy onyń dinı talǵam-tanymynan da aıqyn kórinedi. «Allanyń ózi de ras, sózi de ras, Ras sóz eshýaqytta jalǵan bolmas», – deıdi ol. Bul oı-tujyrymǵa ol Shyǵys pen Batys fılosoftarynyń eńbekterin tereń bilip, zerttep, zerdelep baryp jetkeni anyq. Ol otyz segizinshi qara sózinde Allaǵa degen kózqarasyn tolyq bildiredi. Abaıdyń rýhanı óresine baǵa bergen dintanýshy fılosof ǵalymdar onyń «kámil musylman» uǵymyna erekshe nazar aýdarady. «Kámil musylman» uǵymy tek qazaqqa ǵana emes, búkil musylman álemine qatysty aıtylsa kerek. Mine, bizdiń oıshyl Abaı, hakim Abaı – álemdik deńgeıde osy dinı kózqarasy arqyly da bıikteı beretin tulǵa» dep jazylǵan maqalada.

Prezıdent paıymynsha, elordada barlyq dinniń basyn qosyp, dástúrli jıyn ótkizip kele jatqanymyz ben uly Abaı ustanymynyń arasynda ózara úılesimdilik bar.

Aıta keteıik, buǵan deıin «QazAqparat» agenttigi Aqordanyń resmı saıtyna silteme jasaı otyryp, Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasyn jarııalaǵan bolatyn.